Ракометната федерација на Македонија информира дека ја продолжува соработката со селекторот на машката сениорска репрезентација, Кирил Лазаров, со нов договор кој ќе важи до 2029 година. Од Федерацијата посочуваат дека одлуката е донесена врз основа на заедничка визија, доверба и јасна стратегија за долгорочен развој на македонскиот ракомет.
Претседателот на Ракометната федерација на Македонија, Александар Стефанов, истакна дека континуитетот и стабилноста се клучни за напредокот на националниот тим.
„Официјално ја продолживме соработката со селекторот на нашата машка сениорска репрезентација, Кирил Лазаров, со договор до 2029 година. Веруваме дека континуитетот и стабилноста се клучни за напредокот на националниот тим и македонскиот ракомет во целина. Се надеваме на успешна и плодна соработка во наредниот период, во кој со заеднички труд, посветеност и јасна визија ќе продолжиме да остваруваме добри резултати и да го развиваме нашиот спорт“, изјави Стефанов.
Селекторот Кирил Лазаров порача дека продолжувањето на соработката претставува голема чест, но и сериозна одговорност.
„На заедничко задоволство ја продолживме соработката со Ракометната федерација на Македонија. Водењето на национален тим, поготово на својата земја, е голема чест и одговорност. Благодарен сум за укажаната доверба и поддршка“, изјави Лазаров.
Тој додаде дека во наредниот период репрезентацијата ја очекува сериозна работа со јасно дефинирани цели.
„Пред нас е период исполнет со сериозна работа, јасни цели и високи очекувања. Со заеднички труд, дисциплина и целосна посветеност ќе продолжиме да работиме на напредокот на националниот тим и достоинствено претставување на Македонија, со фокус на стабилност и резултати на долг рок“, порача селекторот.
J. Ѓ.
