Претседателот на СДСМ, Венко Филипче, порача дека нема да има средба за техничката влада со, како што рече, „криминалци кои се обидуваат да ја узурпираат државата“, обвинувајќи ја власта дека бара алиби за распишување предвремени избори.
„Средба со криминалци нема да има. Нема средба за техничката влада, Мицкоски е во тесно, му се брза и бара алиби за распишување на предвремени избори“, изјави Филипче на денешната прес-конференција.
Филипче оцени дека актуелните политички случувања се дел од сценарио подготвено уште минатата година, за кое, како што рече, СДСМ јавно предупредувал со месеци.
„Ова што се случува е сценарио смислено уште лани, кое јас и СДСМ го разоткривме и јавно го говоревме повеќе од два месеци. Предвремени избори, па мигранти за пари“, рече тој.
Според него, во буџетот нема средства, поради што власта се обидува да отвори простор за нови задолжувања.
„Нема пари во буџетот, власта се брза да превезува мигранти, да земе кредит од 6 милијарди евра, плус 20.000 фунти по мигрант, како што пренесоа британските медиуми“, додаде Филипче.
Тој порача дека СДСМ нема да учествува во, како што ја нарече, „тендер коалицијата ВМРО–ЗНАМ“.
„Мицкоски и тендер коалицијата ВМРО–ЗНАМ нека си ги распишат изборите сами кога веќе се имаат испланирано. СДСМ нема да биде покритие за ова сценарио“, изјави Филипче.
Претседателот на СДСМ нагласи дека техничката влада мора да остане поради, како што рече, целосната узурпација на институциите од страна на власта.
„Техничката влада мора да остане, затоа што власта узурпираше сѐ. Ги стави канџите во правосудството, презема целосна контрола врз обвинителството и носи измени на Кривичниот законик спротивно на препораките на Европската Унија“, рече тој.
Филипче обвини дека измените се носат „за заштита на криминалот на власта“, додавајќи дека со резолуции и закони се укинува слободата на говор и се спроведува целосна партизација на полицијата.
Тој најави дека во текот на утрешниот ден ќе организира брифинг на кој ќе бидат презентирани детали за состојбите во правосудството.
„Да не беа овие чекори, можеби и можеше да се разговара. Но ова е класична мафија“, изјави Филипче.
Во продолжение, тој повтори дека нема простор за дијалог.
„Со криминалци кои се обидуваат да узурпираат сѐ и да се спасат себеси, нема седнување на маса за техничката влада – има само одговорност“, нагласи тој.
Филипче повторно ја спомена и, како што рече, поврзаноста со Србија.
„Како е можно во рок од само еден час по изјавата на Вучиќ во Србија, Мицкоски да ги споменува изборите? Што е тоа – коинциденција или тоа што го зборуваме повеќе од еден месец?“, праша тој.
Тој оцени дека меѓународните случувања дополнително ја забрзале ситуацијата.
„Акцијата на Соединетите Американски Држави и Законот за Западен Балкан, каде фокус е борбата против криминалот и корупцијата, ги забрзаа работите. Постојат најави за црни листи и санкции за политичари од целиот регион“, изјави Филипче.
Во завршницата, тој потсети на, како што рече, кампањата на напади и дезинформации против него и СДСМ.
„До вчера ме обвинуваа секој ден, бараа да си заминам од СДСМ, измислуваа приказни за Дубаи, Харис Џиновиќ, Сент Мориц, лажни вести и навреди. И сега – средба? Па дали мислат дека и јас и СДСМ сме наивни?“, рече Филипче.
Тој ја повтори својата позиција со јасна порака:
„Средба нема. Техничката влада останува.“
