Собраниската Комисија за економски прашања, труд и енергетска политика денеска не го прифати предлогот за изменување и дополнување на Законот за минималната плата во Република Северна Македонија, во прво читање, како и предлогот на координаторот на пратеничката група на СДСМ, Оливер Спасовски, за одржување јавна расправа и обид за постигнување договор меѓу трите засеганти страни за зголемување на минималната плата.
Законот го образложи координаторот Спасовски, кој рече дека претставува продолжение на континуираниот раст на минималната плата што започна системски во 2017 година. Спасовски рече дека во изминатите две години растат цените на основните прехранбени производи, енергенсите, комуналните услуги и здравствените трошоци, а потрошувачката кошничка бележи континуиран раст.
– Во такви услови, иако постои законски механизам за усогласување на минималната плата и тоа 50 проценти од растот на просечната плата и 50 проценти од растот на трошоците на живот, реалноста покажува дека динамиката на поскапувањето ја надминува динамиката на законското усогласување. Најзасегнати од ова се граѓаните кај кои минималната плата е единствен извор на приход, рече Спасовски.
Пратеникот Фатмир Битиќи од СДСМ рече дека плата од 600 евра не е каприц туку дека е нормално да се зголеми, а „Владата да ги затвори системските дупки за да не се зголемуваат цените“.
Илире Даути од АА рече дека зголемување на минималната плата би требало да повлече и зголемување на просечната плата.
