Пратеничката група на Левица ќе поднесе измени на два закони со цел финансиско растеретување на физичките лица и малите економски субјекти, информираше денеска пратеникот од Левица, Реџеп Исмаил – Хактан, на прес-конференција, соопштија од партијата.
Според најавата, предлогот предвидува двојно зголемување на максималниот износ за поврат на ДДВ по физичко лице на тромесечје – од 2.100 на 4.100 денари. Дополнително, се предлага зголемување на процентот на поврат преку апликацијата „Мој ДДВ“ – од 20 на 40 проценти за македонски производи и од 10 на 20 проценти за останатите производи.
Покрај тоа, Левица предлага и зголемување на прагот за задолжителна регистрација за ДДВ-обврзник од 2 на 4 милиони денари годишен промет, со образложение дека на тој начин ќе се намали административниот и финансискиот товар врз малите фирми, семејните бизниси, занаетчиите и регистрираните земјоделци.
„Со оваа мерка сакаме да го растеретиме даночниот товар кој во моментов е непропорционално распределен – на штета на малите бизниси, додека големите компании користат бројни олеснувања и субвенции. Административните трошоци и за УЈП и за малите субјекти често се поголеми од самата даночна обврска. Со овој пакет отвораме суштинска дилема – кој навистина го носи товарот на даночниот систем во Македонија? Нашата цел е јасна: прогресивен и праведен даночен систем. Оттука, и во иднина ќе предложиме други мерки од овој тип за остварување на оваа цел“, изјави Исмаил.
Од Левица наведуваат дека измените ќе бидат поднесени во собраниска процедура во наредниот период.
