Драмата како жанр се занимава со криза и конфликт, а Балканот отсекогаш е такво место, истакна познатиот драмски писател Дејан Дуковски на разговорот одржан на Факултетот за драмски уметности (ФДУ) во Скопје. Настанот беше организиран во чест на Дуковски како „Автор во фокус“ на претстојното 60. издание на Македонскиот театарски фестивал „Војдан Чернодрински“.
Проф. д-р Ана Стојаноска, уметнички директор на фестивалот, посочи дека европскиот тренд на постмодерната драма, познат како „In-yer-face theatre“, всушност започнал токму од Скопје преку текстовите на Дуковски, пред воопшто да се појави во Англија кај Сара Кејн. Таа нагласи дека во неговите драми Балканот игра улога на посебен лик, кој служи како дијагноза и коментар на општеството.
Во текот на разговорот, Дуковски се присети на своите почетоци во класата на Горан Стефановски, нагласувајќи ја важноста на менторството и соработката со актерите уште од студентските денови. Тој објасни дека за него театарот е „природен терен“ каде што авторот има поголема слобода во споредба со филмската индустрија. Писателот се осврна и на неговите култни дела како „Буре барут“ и „Маме му е… кој прв почна“, објаснувајќи дека тие настанале како коментар на времето на засилен национализам, но со цел да ја прикажат бесмисленоста на насилството.
На средбата беше отворено и прашањето за кризата во создавањето на нови македонски драмски автори. Стојаноска забележа дека денес недостига практиката од 90-тите години кога соработката меѓу режисерите и авторите почнувала уште на факултет. Дуковски додаде дека театрите треба да имаат поголема отвореност и одговорност кон младите автори, но и дека факултетот мора да ги подигне критериумите за квалитет.
На крајот, Дуковски информираше дека неговиот најнов текст „Црно злато“, кој неодамна имаше премиера во Белград во режија на Оливер Фрљиќ, годинава ќе биде поставен и на сцената на МНТ во режија на Слободан Унковски. До студентите упати совет дека пишувањето бара многу работа и дека клучот е во тоа никогаш да не се откажуваат.
