Синдикатот на културата на Република Македонија (СКРМ) упати јавен повик за масовен протест под мотото „Кога гасите уметници – го гасите светлото“. Протестот е закажан за 28 април, со почеток во 13:00 часот, пред платото на Уставниот суд.
Од Синдикатот порачуваат дека замолчувањето на гласот на уметниците е директен удар врз правдата и иднината на општеството. Според нив, културата и уметноста се темелите на секоја заедница и не смее да се дозволи нивно маргинализирање или гасење.
Борба за достоинство и слобода на израз
Во својот проглас, СКРМ нагласува дека претстојниот протест не е само социјална борба на вработените во културата, туку поширока битка за зачувување на достоинството, слободата и правото на израз. Тие предупредуваат дека институционалниот притисок врз културните работници може да остави трајни последици врз општествениот дијалог.
„Не постои општество без култура. Не постои иднина без уметност. Не постои правда ако гласот на уметниците се замолчува. Ако денес молчиме – утре ќе нема кој да зборува“, се вели во повикот на Синдикатот.
Повик до јавноста за поддршка
Синдикатот ги повикува сите уметници, културни работници, но и граѓаните кои ја вреднуваат слободната мисла, да се приклучат на собирот пред Уставниот суд. Целта на протестот е да се испрати јасна порака до институциите дека уметноста мора да биде заштитена од политички и правни влијанија кои го загрозуваат нејзиниот опстанок.
Од СКРМ очекуваат масовен одзив, потенцирајќи дека ова е критичен момент за одбрана на професионалниот интегритет на сите профили во секторот култура.
Ј. Ѓ.
