Во просториите на Јуроп хаус во Битола се одржа настанот „Кафе со амбасадори“, чија цел е поттикнување отворен и суштински дијалог помеѓу амбасадорите од земјите членки на Европската Унија и граѓаните на тема човекови права, култура, различност и идентитет. На средбата учествуваа австрискиот амбасадор Мартин Памер и заменик-шефицата на мисијата на Полска, Ана Каспржак, кои преку своите искуства ја приближија сложеноста на овие општествени прашања до публиката, информираат организаторите.
Во делот посветен на човековите права беше нагласено дека членството во Европската Унија значително придонело кон унапредување на видливоста на различните малцински заедници во Австрија и Полска. Австрија е посочена како пример за институционализиран пристап со уставно признаени национални малцинства, додека Полска низ годините поминала низ процес на повторно препознавање и прифаќање на малцинските идентитети. Учесниците истакнаа дека историските патишта на двете земји силно влијаеле врз перцепцијата на националниот и европскиот идентитет, при што кај младите генерации сè почесто се среќава чувство на двојна припадност, што претставува предност во современиот свет.
Дискусијата се осврна и на културата како клучен двигател на европската поврзаност, при што беше потенцирано дека членството во ЕУ овозможува поголема мобилност, видливост и соработка. Австрија успешно балансира помеѓу својата културна традиција и поддршката на алтернативните изрази, додека Полска значително го проширила своето глобално влијание преку инвестиции во културната дипломатија. Говорниците го отворија и прашањето за одливот на мозоци, посочувајќи дека слободата на движење во Унијата, покрај придобивките, носи и предизвици за помалите или економски послаби земји.
Настанот беше заокружен со пораки насочени кон европската иднина на државата, при што беше посочено дека процесот на европска интеграција носи реални придобивки за секојдневниот живот на граѓаните во областите на идентитетот, културата и мобилноста. Ваквите иницијативи создаваат простор за размена на практични искуства од земјите членки на Унијата, со цел градење напредок кој се темели на соработка, стабилност и размена на знаења.
