Пратеникот Миле Цеков соопшти дека ја напушта партијата ЗНАМ и владејачкото мнозинство, најавувајќи дека во иднина ќе дејствува исклучиво како независен пратеник во Собранието. Неговата одлука предизвика експресна реакција од лидерот на СДСМ, Венко Филипче, кој оцени дека ова е почеток на распадот на владејачката „тендер-коалиција“.
Во своето обраќање до јавноста, Цеков појасни дека пред две години влегол во политиката за да се бори против криминалот и корупцијата, но дека очекуваните промени не се случиле.
„Не прифаќам да живееме во држава со корупција и криминал, селективна правда и нефункционални институции. Заминувам од политички субјект што формално е демократски, но суштински не ги исполни очекувањата на граѓаните и не застана зад ветувањата“, истакна Цеков. Тој додаде дека не прифаќа младите да се иселуваат поради системот, работниците да живеат со најниска плата, а државата да увезува наместо да произведува храна.
Цеков потсети на неговите досегашни пратенички иницијативи за поддршка на земјоделците, заштита на планината Беласица и Дојранското Езеро, како и за зголемување на минималната плата. Тој нагласи дека останува приврзан на европската перспектива, но со цврста заштита на националниот идентитет, подавајќи рака за соработка кон сите што ги споделуваат неговите вредности во, како што рече, „новиот почеток на борба за правда и одговорност“.
На политичкиот потег на Цеков веднаш реагираше претседателот на опозициската СДСМ, Венко Филипче. Тој преку социјалната мрежа Икс (X) порача дека е добро што внатре во коалицијата на ВМРО-ДПМНЕ и ЗНАМ се наоѓаат луѓе кои ја гледаат вистината.
„Тендер-коалицијата почнува да се распаѓа! Оваа власт е чиста криминална организација која ја уништува државата. На сите кои сакаат да се оградат од оваа криминална група и да не бидат запаметени како соучесници во пропаста на Македонија – вратата на СДСМ е отворена за соработка. Доаѓа времето на вистината, правдата и одговорноста!“, напиша Филипче.
