Само еден месец нè дели од почетокот на јубилејното 25. издание на реномираниот музички фестивал ОФФест, кое е резервирано за првата недела од јуни (од 3 до 6 јуни). Организаторите најавуваат извонредно силна, колоритна, инспиративна и возбудлива програма со музичари од дури 12 земји, при што годинава посебен акцент е ставен на звуците од африканскиот континент.
Првите три фестивалски вечери ќе се одржат во Националната опера и балет (НОБ), додека големото финале е закажано во Младинскиот културен центар (МКЦ).
Официјалната музичка програма по денови е следната:
3 јуни (НОБ): Фестивалот ќе биде отворен со настапите на Guitari Baro и експлозивниот јужноафрикански состав BCUC.
4 јуни (НОБ): Публиката ќе ужива во звуците на норвешкото дуо Nils Økland & Sigbjørn Apeland, како и во настапот на извонредниот домашен двоец Добрила и Доријан.
5 јуни (НОБ): На сцената ќе се качат Raül Refree & Maria Mazzotta, по кои ќе следи моќниот женски колектив Les Amazones d’Afrique.
6 јуни (МКЦ – Денсинг сала): Последната музичка вечер ќе ги донесе енергичните настапи на Matchume Zango и Zawose Queens.
Следејќи ја убавата традиција, во придружната програма на ОФФест ќе има простор и за филмската уметност. На 6 јуни во киното Фросина во МКЦ ќе биде прикажан култниот бразилски документарен филм „ELIS & TOM“.
Визуелниот идентитет и дизајнот на годинешното јубилејно издание се дело на истакнатиот дизајнер Зоран Кардула. Билетите се веќе пуштени во продажба и можат да се набават онлајн преку официјалната веб-страница на фестивалот.
