Министерството за внатрешни работи информира дека се поднесени кривични пријави против родителите на малолетничките кои кон крајот на минатиот месец физички нападнаа 13-годишно девојче во скопската населба Ѓорче Петров.
Единицата за внатрешни работи Ѓорче Петров при СВР Скопје денеска до Основното јавно обвинителство (ОЈО) Скопје поднела вкупно шест кривични пријави за кривично дело „запуштање и малтретирање дете“, кое е казниво по член 201 став 1 од Кривичниот законик.
Според полициското соопштение, кривичните пријави се поднесени против лицата со иницијали Е.А. и А.М., Е.С., Р.С. и Р.Г., С.А., В.И. и Ѓ.И., како и А.Т. и Т.Т. Основата за кривичното гонење на овие лица е фактот што нивните малолетни деца извршиле кривично дело насилство (член 386 од КЗ), односно учествувале во физичкиот напад врз 13-годишната малолетничка.
Од полицијата потсетуваат дека претходно, на 29 април, за истиот случај кој предизвика бурни реакции во јавноста, ЕВР Ѓорче Петров веќе поднесе кривична пријава до ОЈО Скопје директно против четирите малолетнички кои го извршија нападот.
