Асоцијацијата на спортски обложувалници на Македонија (АСОМ) најостро реагира на Предлог-законот за игрите на среќа и бара негово итно стопирање за да не биде проследен до Собранието. Според нив, донесувањето на овој закон претставува директен обид за затворање на легалните приредувачи, монополизација на индустријата и отворање на нелегално обложување според примерот на соседна Албанија.
Од АСОМ изразуваат шок од нетранспарентноста со која, како што велат, се турка овој закон. Тие посочуваат дека Владата го усвоила новиот предлог-закон на седница одржана на 12 мај 2026 година, без претходна објава на ЕНЕР и без никакви консултации со легитимните претставници кои опфаќаат 95% од пазарот.
Според предупредувањата на Асоцијацијата, ефектите од евентуалното носење на овој закон ќе бидат катастрофални за економијата. Предлог-законот ќе значи затворање на над 10.000 директни и повеќе од 50.000 индиректни работни места поврзани со оваа индустрија, додека државниот буџет ќе изгуби повеќе од 280 милиони евра на годишно ниво. Дополнително, затворањето на објектите ќе предизвика крах на пазарот на недвижности, бидејќи повеќе од 800 објекти кои моментално се под закуп ќе останат празни.
„Со уривањето на легалната индустрија, Владата свесно ја отвора вратата за нелегалното обложување“, предупредуваат од АСОМ. Тие сметаат дека затворањето на легалните објекти нема да ја намали желбата за игра, туку ќе ја префрли во нелегалните онлајн платформи и темните подруми кои се надвор од институционална контрола.
Посебен акцент се става на заштитата на малолетниците. Од АСОМ укажуваат дека во такви нерегулирани услови на црниот пазар, кој не познава правила ниту етика, малолетниците ќе бидат најизложени на ризик. Како доказ за тоа се посочува Албанија, каде по слични забрани брзо се отвориле многу нелегални објекти, што резултирало со пораст на криминалот и ставање на играчите во ризик.
Од Асоцијацијата реагираат и на предвидените астрономски давачки во законот. Тие тврдат дека овие давачки се дизајнирани со единствена цел – финансиско исцрпување и банкрот на приредувачите. Исто така, АСОМ остро се спротивставува на монополизирањето на приредувањето игри на среќа преку интернет, каде според предлогот, исклучивото право ѝ се доделува на државата. На овој начин државата целосно ги исклучува лиценцираните приредувачи од онлајн пазарот.
На крајот, од АСОМ порачуваат дека нема да дозволат уништување на легалната индустрија на сметка на нелегалната и ќе се борат со сите расположливи капацитети. Доколку Владата не го повлече законот за да се донесе функционално европско решение низ дијалог, Асоцијацијата не исклучува можност за организирање масовни протести.
