Хорот „Драган Шуплевски“ при Факултетот за музичка уметност (ФМУ) – Скопје, под раководство на маестро проф. м-р Сашо Татарчевски, забележа извонредна презентација на еден од најголемите универзитетски фестивали во Европа. Станува збор за фестивалот „Universitas Cantat“, кој има долга традиција и претставува форум на најквалитетните светски универзитетски хорски ансамбли. За македонскиот хор, ова е трета покана за учество, што претставува извонредно признание само по себе.
Овој пат, хорот настапи во формација на женски хор, а одржаните концерти поминаа со огромна посетеност и интерес. Првиот концерт се одржа во катедралата „Св. Никола“ во градот Калиш. По настапот, на приемот организиран од свештеникот на катедралата, македонските претставници имаа чест да видат голема фреска на која се претставени патроните на скопскиот универзитет, светите браќа Кирил и Методиј.
Вториот настап се одржа во импозантната концертна сала на универзитетот „Адам Мицкјевич“ во Познањ. За оваа прилика, маестро Татарчевски избра програма со композиции од македонските музички бардови: Тодор Скаловски, Трајко Прокопиев, Драган Шуплевски, Кирил Македонски и Александар Лековски. Изведбите наидоа на бројни аплаузи од публиката, а особено беа впечатливи бурните реакции и овации од останатите учесници на фестивалот од САД, Германија, Унгарија и Полска, кои продолжија и откако македонските студентки ја напуштија сцената.
Покрај самостојните концерти, студентките учествуваа и во осмислени работилници, како и во заедничката подготовка и изведба на композицијата „On – Off“ од Зузана Фалковска, специјално создадена за овој настан.
Од ФМУ посочуваат дека континуираните успешни настапи на хорот „Драган Шуплевски“ носат покани за нови еминентни настани и претставуваат голема афирмација за факултетот, УКИМ и за државата во целина.Овие претставувања се поддржани од Министерството за култура, УКИМ и ФМУ – Скопје, а се одржуваат под покровителство на претседателката на државата, Гордана Сиљановска – Давкова, по повод 60-годишнината на Факултетот за музичка уметност.
