Јубилејното 25. издание на реномираниот музички фестивал ОФФест својата завршна вечер ќе ја зачини со уште еден автентичен, моќен и револуционерен африкански звук. На 6 јуни, во Денсинг салата на Младинскиот културен центар (МКЦ) со почеток во 23:00 часот, македонската публика на завршната вечер на фестивалот ќе има прилика да го проследи настапот на танзанискиот состав „Zawose Queens“.
Групата, која пред скопската јавност ќе се претстави во состав: Пендо Завосе (вокал, перкусии), Леа Завосе (вокал, перкусии), Бен Браун (тапани, придружен вокал) и Тал Џејнс (гитара, бас, придружен вокал), ја продолжува долгата традиција на флуидни полиритми и занесно полифоно пеење на народот Гого (познат и како Вагого) од регионот Додома во централна Танзанија. Како директни потомци на големиот Хукве Завосе, Леа и Пендо биле опкружени со музика во текот на целиот свој живот.
Она што го прави овој состав посебен е нивната храброст да ги преиспитаат и урнат традиционалните табуа. Имено, кај народот Вагого на жените традиционално им било дозволено да пеат само придружни хармонии и да свират на мал тапан наречен „мухеме“, но овие две уметнички одлучиле да го предизвикаат тој обичај. Нивното поврзување со британските продуценти Оли Бартон Вуд и Том Ексел во Танзанија во 2019 година, резултираше со објавување на нивниот импресивен деби-албум „Maisha“ во 2024 година, со кој официјално се најавува една сосем нова ера.
Албумот „Maisha“ ги претставува „Zawose Queens“ на моќен, инвентивен и целосно ослободен танцувачки начин. Нивната фузија спојува органски хармонии и електронски елементи, преку кои тие длабоко се поврзуваат со природата, церемонијата и ритуалот. По успешните настапи на светски познатите сцени и фестивали како Glastonbury, Womad, Sauti Za Busara и Womex, „Zawose Queens“ на завршната вечер на ОФФест ќе ги донесат своите источноафрикански корени збогатени со суптилни електронски елементи, модерни битови и карактеристични „дропови“.
Редакција Фронтлајн
