Во Собранието на Македонија денеска се одржа 9. седница на Националниот совет за евроинтеграции, на која беа претставени клучните аспекти на процесот на европска интеграција, со посебен акцент на политиката на проширување на Европската Унија, реформските процеси и обврските кои ѝ претстојат на државата на патот кон полноправно членство.
Седницата ја отвори претседателот на Националниот совет за евроинтеграции, Венко Филипче, кој истакна дека целта на состанокот е да се отвори конструктивна дискусија за актуелните аспекти на проширувањето и динамиката на процесите кои се одвиваат во рамките на Унијата. Филипче нагласи дека проширувањето повторно се наоѓа меѓу врвните приоритети на ЕУ и даде осврт на критериумите што земјите кандидатки мора да ги исполнат, како и на досегашните чекори на нашата држава.
Пред присутните се обрати и амбасадорот на Европската Унија и шеф на Делегацијата на ЕУ во земјата, Михалис Рокас. Тој ја поздрави способноста на државата да ги спроведува потребните реформи и ја истакна клучната улога на Собранието при усвојувањето на реформската легислатива.
ЕУ амбасадорот Рокас подвлече дека е неопходен широк политички консензус за сите клучни закони, со посебен акцент на Изборниот законик. Покрај тоа, тој предупреди дека претстојниот позитивен извештај од Европската комисија ќе зависи пред сè од конкретниот напредок во областа на владеењето на правото.
Министерот за европски прашања, Беким Сали, во своето обраќање посочи дека интеграцијата во ЕУ мора да се одвива во два паралелни правци – преку доследно спроведување на суштинските реформи во правосудството и преку максимално искористување на можностите за постепена интеграција уште пред официјалното полноправно членство.
Сали истакна дека реформскиот план не се спроведува единствено како обврска кон Брисел, туку како директна потреба на државата за изградба на посилни институции, независно судство, поефикасна борба против корупцијата, слободни медиуми и подобар животен стандард. По воведните говори, пратениците и членовите на Советот преминаа на отворена дискусија за следните чекори и предизвици во евроинтегративниот процес.
