Туристичкиот сектор е комплетно замрен, не само кај нас, туку во цела Европа. Ако лани 51 отсто од вкупниот број туристи во светот ја постиле Европа, а Франција беше прва земја по посета на туристи, тогаш можеме да претпоставиме каков е моменталниот ефект. Тој е нула. Не постои, вели Љупчо Јаневски, директор на Агенцијата за поддршка и промоција на туризмот (АППТ).
Ограничувањето на движењето, патувањата меѓу земјите од шенген-зоната, затворањето и изолацијата придонесе туризмот да биде нула, вели во разговор за МИА директорот Јаневски.
Јаневски најавува дека покрај веќе донесените мерки за поддршка на туристичкиот сектор кој беше прв на удар од корона вирусот, се подготвуваат и дополнителни мерки за ублажување на состојбата. Координативното тело е во постојана онлајн комуникација, не само интерно, туку и со надлежните во Владата.
Спасот на секторот, Јаневски годинава го гледа во домашните гости.
Тој, како што истакнува, покрај официјалните мерки кои се разгледуваат, размислува пред соработниците да изнесе и свои, сопствени предлози за надминување на ситуацијата. Некои од нив се: на хотелиерите неповратно да им се врати туристичката такса што ја платиле лани, на тур-oператорите и туристичките агенции да им се врати процент од девизниот прилив што го оствариле преку реализирани аранжмани, а на превозниците, покрај даночните олеснувања, да им се олесни и регистрацијата на возилата, како и да им се субвенционира дел од потрошеното гориво врз основа на претходно утврдена методологија.
