Европската фудбалска унија (УЕФА) објави дека ќе издвои 236,5 милиони евра за да им помогне на земјите-членки за загуби предизвикани од корона пандемијата, односно по 4,3 милиони на секоја од 55-те членки на организацијата.
– Фудбалот се соочува со еден непредвидлив предизвик што ни го донесе корона вирусот. УЕФА сака да им помогне на своите членки да одговорат на овој предизвик на начинот на кој тие сметаат дека треба.
Како резултат на тоа, решивме да исплатиме по 4,3 милиони евра на секое здружение до крајот на оваа и следната сезона, што ќе биде инвестиција со која националните федерации ќе можат да ја обноват фудбалската заедница во нивната земја, изјави претседателот на УЕФА, Александар Чеферин.
Парите ќе бидат исплатени од Фондот за итни случаи „Хеттрик“.
