Претседателот на државата, Стево Пендаровски, по повод празникот на трудот и работничките права, 1 мај, упати порака со која го честита празникот на трудот и се заблагодари на сите работници кои деноноќно се вложуваат во борбата против корона вирусот.
Денот на трудот, 1 Мај, годинава е под товарот на пандемијата предизвикана од ширењето на корона вирусот во глобални рамки. Но истовремено, овој ден нѐ потсетува дека треба уште повеќе да го вреднуваме вложениот труд на сите коишто придонесуваат во нашето општество. Здравствените работници се деноноќно на своите работни места, како и припадниците на полицијата и армијата. Новинарите и медиумските работници, вработените во продажните и услужните дејности, комуналните работници секојдневно се ангажирани надвор од своите домови. За многумина, работните процеси за првпат се организирани на поинаков начин.
Секој 1 Мај ги одбележуваме и постигнувањата за кои се изборија работниците и синдикалните организации, залагајќи се за пристојни услови за работа и целосно почитување на работничките права. Тешкиот удар врз економијата којшто го нанесе пандемијата е причина повеќе да работиме кон целосно почитување на работничките права, да го споделуваме товарот, како и да покажеме поголема солидарност, стои во пораката од шефот на државата на неговата официјална интернет страна.
Пендаровски сподели статус со честитка и на официјалниот Фејсбук профил.
А. Н. С
