Шест или седум вакцини за Ковид-19 се во рана фаза на клинички испитувања, изјави денеска на прес-конференција д-р Катерина Смалвуд, од Канцеларијата за Европа на Светската здравствена организација.
– СЗО помага во координација на глобалните напори за изнаоѓање вакцина за Ковид-19. Тоа исто така е поддржано од голем број меѓународни претставници од приватниот сектор и иницијативи. Што се однесува до бројот на вакцини кои се развиваат, се работи за десетина. Неколку различни истражувачки институции и влади се вклучени во процесот. Во моментов, половина од нив, шест или седум од вакцините се во ранa фаза на клинички испитувања. Ова е многу охрабрувачка вест, но ние мораме да бидеме екстремно реални дека за развој на вакцина е потребно многу време, рече таа на прес-конференцијата одговарајќи на новинарски прашања.
Она што СЗО го кажува генерално, додадва Смалвуд, е дека за развој на вакцина би требало да очекуваме 18 -месечен процес наспроти неколку години колку што е потребно да се развие една вакцина.
СЗО е вклучена во зајакнување на меѓународната соработка за истражување и развој на вакцина за Ковид-19.
– Ја охрабруваме понатамошната соработка во однос на ова прашање, рече претставничката на СЗО, посочувајќи дека СЗО ги повикува сите кои работат на развој на вакцина и институции да се здружат со меѓународните групи, да ги споделат информациите се со цел да биде постигнат одреден бенефит, рече Смалвод на денешната редовна неделна прес-конференција и брифинг на СЗО Европа за состојбата со Ковид-19.
Во однос на ризикот за втор бран на епидемијата, кој би можел да се очекува наесен, претставничката на СЗО, рече дека се разгледуваат повеќе потенцијални сценарија за коишто е рано да се зборува, но потенцира дека дали ќе има или нема да има втор бран зависи индивидуално од земјите односно спроведувањето на мерките од страна на граѓаните./МИА/
