Kако општество и како одговорни поединци не смее да дозволиме државата да продолжи да функционира со техничка Влада, со бројни шанси за вето и без Парламент. Собранието и Владата мора да се во полн технички и политички капацитет со цел успешно спроведување на мерките во борбата против пандемијата и ковид-19, како и сите последици од него, истакна денеска заменик – претседателката на СДСМ Радмила Шекеринска на прес-конференција во Битола, по средбата со кандидатите за пратеници во ИЕ 5, пренесе 360 степени.
Како носител на листата во оваа изборна единица, Шекеринска како и нејзиниот сопартиец, Оливер Спасовски во Куманово претходно, посочи дека изборите мора да се одржат на 5 јули.
„Мора да знаеме дека имаме одговорност пред граѓаните, пред државата, и посебна одговорност за здравјето на граѓаните. Не смееме да се втурнеме во бескрајни преговори кои граѓаните ќе ги држат во заложништво, не смееме да бидеме жртви на бескрајни преговори само, и само затоа што Мицкоски се плаши од избори, а преку своите министри прави саботажи и на штета на граѓаните. Секој оној што сака да ги одложи изборите, всушност сака да ја продолжи кризата, а со тоа не и посакува добро ниту на државата, ниту на граѓаните. Затоа, да ги послушаме советите кои дојдоа од страна на сите стручни лица, да се искористи првиот можен период за да добиеме функционални институции кои ќе ни помогнат да се справуваме со епидемијата и во вториот дел од годината“; рече Шекеринска.
Таа посочи дека како партија направиле се’ да се постигне договор и да испратат порака дека како држава знаеме да носиме одлуки и ја обвини ВМРО-ДПМНЕ дека последниов период избегнува средби.
„Ние како партија ќе даваме предност на консензусот, но консензус не може да значи запирање на се во државата, не е консензус граѓаните и државата да се држат во заложиштво, ние направивме се за да дојдеме до договор, но изборите не може да се одлагаат за после 5 јули. Направивме се, ќе разговараме, но државата не смее да ја плати цената на стравот и калкулациите на ВМРО-ДПМНЕ“, рече Шекеринска.