Предизборниот телевизиски дуел на Зоран Заев и Христијан Мицкоски стандарден, лидерот на СДСМ низ аргументи повторуваше јасни ставови во однос на стратешките државни прашања, лидерот на ВМРО-ДПМНЕ остануваше со сѐ помалку одговори. Колку и да се обидуваа Заев и водителот да изнудат став од Мицкоски за двата клучни документа кои на државата и го отворија европскиот пат, Преспанскиот договор со Грција и Договорот за пријателство со Бугарија, сепак опозиционерот повторно не се изјасни.
Заев го потсети Мицкоски на настапите на неговата носителка во првата изборна единица, Гордана Силјановска Давкова, која лани во трката за претседател, во обид да добие повеќе гласови, ги дефинирала договорите како завршена работа, а година потоа, како учесничка на претстојните парламентарни избори, најавува дека ќе ги ревидира, поништи и што ли уште не, потврдувајќи ги своите националистички ставови.
И по ова Мицкоски остана без став за какви ги смета договорите со двете соседни држави и како планира да се однесува кон нив во иднина, особено ако стане премиер. Неговото неизјаснување практично потврдува дека Мицкоски уште нема расчистено дали навистина се заложува за влез на земјата во Европската Унија, или и тој го продава истиот филм од Никола Груевски, само декларативно манипулира, а во пракса ништо не презема. Ако ВМРО ДПМНЕ верува во тоа што го напишала во изборната програма дека влезот во ЕУ е стратешка цел тогаш мора да ги почитува и спроведува договорите со Грција и Бугарија затоа што без нив нема напредок на државата. Ако ВМРО ДПМНЕ има план дека ќе застане зад договорите, како гарантори на европската иднина, тогаш зошто Мицкоски не го соопштува ставот? Сигурно се плаши дека ќе ги загуби и тие гласови кои ги има, од кои голем дел се уловени на национализмот и лажниот патриотизам што го шири.
Затоа на Мицкоски му е полесно сега да извртува тези за договорите и да купува гласови со тоа што ќе ги негира, при тоа свесен дека утре, ако седне во владата, ќе мора да ги прифати договорите такви какви што се, па и да ги спроведе до крај. Секако дека мисли оти после од позиција на премиер полесно ќе му биде да им признае на граѓаните дека сепак, договорите се единствениот пат до Брисел, нешто кое сега не би го кажал ни во сон.
На дуелот во МРТВ Мицкоски на неколку пати одговорите ги започнуваше со тоа дека изнесените податоци од страна на Заев се неточни, иако тие податоци се точни и лесно се проверува нивната веродостојност. На пример, на сите им е јасно дека името на државата е Северна Македонија, но жителите се Македонци, а јазикот е македонски, тоа го признаа и ЕУ и ООН, но кога тоа го изнесе Заев пред јавноста, Мицкоски се прави наудрен и пак повторува како на лента дека Заев го продал јазикот и идентитетот.
Понатаму, Заев во дуелот набројуваше успеси од изминатите три години, наведе дека државата е членка на НАТО, дека започнуваме преговори со ЕУ, дека минималната плата е зголемена за 60 отсто, дека е зголемена просечната плата и уште некои други факти, на што Мицкоски одново возврати дека тоа што го зборува Заев не е точно. Знае Мицкоски дека е точно, ама не ја прифаќа вистината.
На крајот, Мицкоски не сакаше да одговори кои се тие три компании кои ќе инвестираат во државата уште во првите 100 дена од новата влада, па се доби впечаток дека не ја зборува вистината. Пак му го повторија прашањето кој тоа ќе инвестира, ама Мицкоски пак не одговори. Затоа Заев конкретно ги кажа имињата на компаниите со кои преговараат, со што се занимаваат и колку пари ќе инвестираат. Овие четири компании се дел од најавените милијарда евра инвестиции на СДСМ за следните четири години.
Ова беше последното телевизиско соочување на двајцата лидери, претенденти за премиер, во кампањата, но дали и последен настап на Мицкоски на кој не соопштува ставови за важни прашања? Тоа тешко.
Од соработничката екипа на Фронтлајн
