Опомени за над 700 фирми кои добиле пари од државата, а не ги исплатиле вработените, следен чекор, јавно објавување

Над 700 фирми од земјава, најголемиот дел од Скопје, Тетово, Гостивар, Струга, Куманово, побарале поддршка од државата преку мерката за исплата на плата на вработените поради корона кризата, но парите на вработените не ги дале. Опомени се пратени до фирмите поради неисполлнување на обврските од уредбата, роковите се поминати за исплата, но од Управата за јавни приходи, апелираат да ги исплатат и да ја исполнат обврската, пред да бидат спроведени предвидените законски дејствија и да бидат јавно објавени.

Фирмите согласно владината мерка може да побараат поддршка од државата за исплата на плати на вработените, а со цел задржување на работните места, за април, мај и јуни. Анализата за спроведување и искористување на мерката за април и мај е готова и УЈП ја претстави, а за јуни се во тек анализите.

Анализата покажа дека 281 работодавач во април примиле поддршка во износ од 9 милиони 995 илјади 565 денари, а не ја исполниле обврската за исплата на плата за 722 вработен и во мај 427 компании воопшто не исплатиле плата за 984 вработени, а добиле финансиска поддршка во износ од 13,698,998 денари. Сто и дваесет компании од нив не ја исполниле обврската добиената помош добиена за вработените да ја исплати и за двата месеца.

Најчесто фирмите се средни, мали и микро претпријатија, а меѓу дејностите се од трговија, подготовка на оброци и служење храна, градежниот сектор, производство на облека, емитување програма, објекти за сместување, транспот, образование и слично.

За април 2020 на 19.780 работодавачи е исплатено вкупно 1 милијарда 793 милиони 207илјади 630 денари, за вкупно 128 илјади 315 вработени, додека за мај добиле  19.938 работодавачи во вкупен износ од 1 милијарда 666 милиони 373 илјади 597 денари, за вкупно 119.182 вработени.

Во двата месеца имало и такви компании кои побарале исправка за финансиската поддршка но не извршиле исплата а износот на плата по поднесените исправки. За тие комании, како што рече директорката на Управата за јавни приходи, Сања Лукаревска податоците ќе се достават до Министерството за труд и социјална политика за да може да се утврди дали задржаните средства се основани или не.

На работодавачите кои користеле финансиска поддршка, а не извршиле исплата на плата доставени им се опомени за неисплатена плата и доколку не извршат исплата во определениот рок, ќе следи спроведување на постапка на присилна наплата на платата. Дополнително, додаде, Законот за придонеси од задолжително социјално осигурување во ваков случај предвидува изрекување на глоба за сторен прекршок, а работодавачот ќе биде задолжен да ги врати добиените финансиски средства во целост, заедно со камата, во спроведена постапка на УЈП во соработка со Државниот инспекторат за труд.

-Управата за јавни приходи, располага со детални податоци за искористеноста на финансиската поддршка и будно ја следи состојбата на искористеност на мерките, но и почитување на обврските од законот. Податоците за компаниите кои примиле финансиска поддршка, а не ја исполниле обврската за исплата на платата ќе бидат доставени до Генералниот секретаријат на Владата како носител на мерката и исплатувач на финансиската поддршка, од каде истите ќе може да бидат и јавно објавени, рече Лукаревска.

Управата за јавни приходи дополнително ќе соопшти податоци од анализата за спроведување на мерката за месец јуни.

Во јуни 2020 финансиска поддршка е дадена на 17905 компании во износ од 1 милијарда 404 милиони 470 илјади и 647 денари, за вкупно 101 илјади 148 вработени.