Криењето на контактите на заразените лица е голема мака со која Битола се соочува во справувањето со корона вирусот во последниот период. Ова како сериозен проблем за ширењето на корона вирусот во Битола го предочува и градоначалничката на Општина Битола, Наташа Петровска, која е и координатор на Кризниот штаб, обајави Независен.мк.
Во градот од почетокот на корона кризата потврдени се 178 позитивни случаи, од кои активни се дури 77 случаи или 43 отсто од вкупниот број на заразени. Досега оздравеле 95 битолчани, а починале шестмина, од кои најмладиот 27-годишно момче. Она со што во последниот период се соочуваат битолските епидемиолози е криење на контактите, пишува Независен.
Анализирајќи ги податоците од 1 до 13 август, над десет ковид позитивни лица не даваат податок за контактите.
„Според констатациите од здравствените работници криењето на контактите на заразените лица е навистина сериозен проблем. Лицата кои веќе се заразиле со Ковид-19 мора да мислат на здравјето на другите, при што нема да ги кријат контактите кои ги оствариле во изминатиот период, а со тоа ќе придонесат за спречување на ширење на вирусот. Во случаите во кои се доставуваат доволно податоци за контактите, се создава можност за заштита на сите потенцијално ризични групи, но онаму каде што податоците се скриени, се создаваат можности за појава на нови кластери“, вели градоначалничката Петровска за „Независен“.
Бројот на заболени во Битола постојано расте. Според анализите направени од почетокот на август до денес потврдени се 41 позитивен случај во градот и еден починат, а во исто време оздравеле 34 битолчани. .
Расте бројот на непослушни битолчани кои наместо во изолација шетаат низ градот. Дури и младите кои носат маски се жалат дека се исмејувани од нивни врсници.
„Од дома излегуваме со маски за да ги имаме како доказ доколку не запре полиција и за да ги исполниме барањата на родителите за заштита. Потоа, кога ќе се сретнеме со пријателите ги повлекуваме зашто сме исмевани доколку ги носиме. Нашите врсници велат дека корона не постои и дека маските нема да нѐ заштитат“, пишува група млади битолчани во реакција до локалните медиуми.
Тие велат дека се изморени да се објаснуваат со врсниците за постоењето на вирусот.
Извор: Независен.мк
