Во новиот Ургентен хируршки центар, сместен во кругот на Општатa болница Куманово, за една година од пуштањето во употреба кон крајот на јули, минатата година, до денеска се извршени 34.100 хируршки и 8.000 ортопедски прегледи. Направени се и 7.600 преврски, имобилизации, како и други хируршки интервенции, истакна директорката на болницата, Снежана Захариева.
Комплетно новиот објект на Ургентниот центар, како што информираат од Министерството за здравство, е со површина од 750 метри квадратни и овозможува над 200 илјади граѓани од североисточниот регион, на едно место да добијат хируршки, ортопедски и анестезиолошки третман со современа медицинска опрема во амбулантите и во дневната болница.
Од болницата посочуваат дека има добра екипираност на медицинскиот кадар. Посебно значајно е, како што се потенцира, што неопходната здравствена услугата се обезбедува на едно место, што дава подобра можност за комуникација, консултација и решавање и на најтешките случаи. Во ургентниот центар се третираат пациентите кои доаѓаат со упат од матичен лекар, но и тие кои дошле за некоја ургентна или животозагрозувачка состојба.
– Продолжуваат инвестициите во кумановската болница, се чека новиот оперативен стол за офталмолошката сала, набавен е и тимпанометар за ОРЛ одделот, обезбедени се и поголем број монитори, а се планира и преуредување на одделот за неврологија, каде ќе се набави и нов ЕЕГ апарат со средства од болницата, додаде д-р Захариева.
