Актерката Владанка Димковска започнува нов проект во FRONTLINE.MK или, како што самата го нарече: FRONTLINE ACTION, видео колумна со која ќе се појавува еднаш неделно на порталот. Камерата на најавата и на првата епизода, која е веќе снимена, е на Атанас Петровски, а продуцентка е Биљана Јордановска. Хаштагот за нејзиниот проект е #FrontAction или #ФронтАкција.
Видео колумните на познатата актерка, според најавата, ќе се однесуваат на сѐ што е актуелно во општеството, од родовите прашања до потребата за менување на системот во кој младите и нивните потенцијали ќе дојдат до полн израз.
„Наместо да се разочарам од реалноста дека сонот не се остварува толку лесно, ги засукав ракавите и почнав да работам на себе. Почнав да се надоградувам на сите полиња. Видов дека ме интересираат многу работи за кои не сум имала време, почнав да ги студирам луѓето, почнав да ги учам работите кои никогаш не сум мислела дека ќе ми требаат“ – изјави актерката Владанка Димковска во интервју за порталот Црно-бело.
Дипломира во класата на Златко Славенски на ФДУ, со претставата “Сината соба”. За кратко време станува успешна и препознаена кај публиката и критиката. Ги сака самостојните проекти на театарската сцена, а пошироката публика ја помни и по „ТВ Бокс“, прво театарска претстава, а потоа и серија што се емитуваше на ТВ Телма. Неодамна, маестрално ја одигра и својата улога во монодрамата „Прво лице еднина“ во Кумановскиот театар, во режија на Драгана Гунин.
„Наше е кој пат ќе го одбереме. Ние мораме да бидеме свесноста на општеството, да го менуваме и да го обликуваме и тоа не смееме да прекинеме да го правиме. Затоа мислам и силно верувам дека театарот може да влијае на политиката на една држава“ – вели Димковска во споменатото интервју.
Владанка е на постдипломски студии по политички науки. Како уметница, таа во целост ја разбира и ја прифаќа одговорноста на интелектуалците во општеството и е гласна активистка за човекови права.
Да ѝ посакаме добредојде на актерката, интелектуалката и активистката Владанка Димковска! Со нетрпение ја очекуваме нејзината прва епизода FRONTLINE ACTION во текот на идната недела.
