Платите да не се покачуваат, парите да не се враќаат!

пишува: ЏАБИР ДЕРАЛА

Куририте не можат веќе да се снајдат. Исто како и нивните газди во грдата палата, прават невидени гимнастики, ама почнаа веќе да им попуштаат тетивите. Толку ги бива. Всушност, тоа е истиот организам, само со различни функции. Една порака се генерира од едно место, а потоа се „фотокопира“ на сите страни, ама баш на секое ќоше, по многу пати. Навистина, планетата Земја има сериозен проблем со загадувањето, а таму некаде сме и ние, но загадувањето со црна пропаганда под плаштот на медиумите нема крај. Последиците ги трпиме секој ден. Оваа бескрајна контаминација со квази политика го уништува здравјето на општеството, на секој поединец и не дозволува да се дише, понекогаш и буквално.

Тука, за миг, ќе престанам со големи зборови и „катаклизмични“ изрази, како што се изрази Мицкоски за македонското лозарство, без да знае за што, всушност, зборува. Ќе направам една илустрација за само една од стотиците пропагандни содржини што се подметнуваат секој ден во медиумите. Изгледа како да е само уште една купи-ден-помини “баљезгарија”, ама не е.

Скролајќи низ најголемиот агрегатор на медиумски содржини, ми привлече внимание една „досетка“ што ја прочитав во едно „курирско“ порталче (парталче). Ја коментираат директорката на УЈП која изјави дека 2,6 милиони евра ќе им се вратат на граѓан(к)ите за само два месеци по воведување на мерката Мој ДДВ. Парталчињава направија математика, па многу „досетливо“ иронизираа дека за два месеци на секој граѓанин во земјава ќе му биде вратено едвај нешто над едно евро.

Класичен пример за уличарска итрина, како кога приглупиот маалски тепач се обидува да биде вицкаст, додека поминуваат убави девојки по улицата. И така, големите статистичари и математичари „заборавија“ да кажат дека, за прв пат, се враќаат пари. Да не се враќаат ли?! Навистина, тоа е пораката, да не се враќаат парите од ДДВ-то. Башка што лажат, не е одвај нешто повеќе од едно евро. Не знаеме дали сме два милиони, па така сигурно не е само едно евро. А просекот што го изведуваат се однесува на сите, ама баш на сите, па и новороденчињата. И, заборавија да кажат дека тие новороденчиња се дел од семејства, па така износот расте за најмалку 3-4 пати по домаќинство. И не кажаа дека ова е почетокот на едно ново размислување, нов однос кон парите на граѓан(к)ите – да им се враќаат, за првпат.

Ваквиот начин на валкано спинување ме потсети и на Трајко Славески кој го немаше таман толку долго што успеавме и да го заборавиме. Неодамна, тој тресна дека владата не треба да ја покачува минималната плата, дека тоа ќе предизвикало хаос. Покачување на плати не е пожелно за професор Трајко, ќе предизвикало хаос. Богати!

И зошто сега би требало да им се обрнува внимание на вакви глупости? Затоа што ваквите, навидум гафови, се дел од добро организирана пропагандна машина што се храни од нашите пари и ги напаѓа алгоритмите на агрегаторите на вести и пребарувачките машини на интернет. И од наивноста на луѓето.

За три години се изнагледавме и изнаслушавме сѐ и сешто, но суштината е една, пораката е една. Мора да се осуети македонската демократска трансформација од пропутиновски (ердогански, орбановски, салвиниевски), клептократски и авторитарен чмар на Европа во модерна демократија со европски перспективи. Тоа е агендата, тоа е целта. Затоа, сите капацитети, а не се мали, се насочени против тоа.

Затоа имаше опструкции на транзицијата на власта, затоа се изведе крвавиот 27-априлски напад на Собранието, затоа во име на партијата која веќе нема ни 51 пратеник, туку осум помалку, се наметнуваат преговори… Затоа, кога се носеше законот против корупција дадоа сѐ од себе да го осуетат. Затоа и сега вложија огромни пари да го спречат и Законот за јавно обвинителство. Тоа е, ништо помалку, ништо повеќе. И огромните црни пари што циркулираат наоколу низ медиумите и дома и во странство, се вложуваат во таа агенда. Човек треба само малку да ги подотвори очите и ќе го види тоа.

Падот на режимот е долг, предолг. Тој е вгнезден во институциите, во криминалното и политичкото подземје, во медиумите, во бизнисот… И во главите на луѓето.

Сите права се задржани. Преземањето е возможно само со писмена дозвола од Редакцијата.