Шефот на дипломатијата Бујар Османи денеска најави дека неговата прва билатерална посета ќе биде на Бугарија што, како што потенцира, претставува порака сама за себе, бидејќи укажува дека подобрувањето, односно одржувањето на односите со нашите соседи, вклучувајќи ја и Бугарија, е наш сериозен интерес и приоритет.
– В петок одам во официјална посета на Бугарија каде средбата со мојата колешка Захариева, ќе биде првата моја билатерална официјална средба како министер за надворешни работи и очекувам да испратиме пораки на пријателство, на заемна поддршка и во насока на заедничкиот интерес за европската иднина на целиот регион. Оваа посета претставува и исполнување на првиот приоритет од мојата мандатна мисија како предводник на дипломатијата, а тоа е активен придонес во одржувањето и унапредувањето на добрососедските односи, порача Османи.
Тој изрази очекување дека на средбата ќе стане збор за сите прашања, како што рече, во поддршка на создавање услови за непречена работа на Мешовитата експертска комисија дури и во време на рестриктивните мерки на пандемијата, како и отстранување на сите пречки за засилена политичка, но и економска соработка помеѓу двете земји.
Со Захариева, посочи Османи, ќе разговараат и за заедничкото копретседавање со Софискиот самит од Берлинскиот процес, што е закажан за почетокот на ноември.
– Нам ни претстојат две работни сесии помеѓу министрите за внатрешни работи и министрите за здравство и верувам дека со засилена политичка активност во рамки на Берлинскиот процес, но и со најавените посети ќе ги адресираме овие предизвици коишто стојат на патот на продлабочување на политичката соработка и пријателството помеѓу двете земји коишто се апсолутно неспорни, рече Османи.
Тој додаде дека интензивирањето на комуникацијата на политичко ниво и на ниво на стручните тела, на комисиите, најмалку ќе ги оттргне предрасудите што, како што истакна, можеби се создадоа во меѓувреме, можеби и поради пандемијата и одржувањето на изборите, што придонесе во некое ослабување на динамиката на комуникација и тоа ќе биде вредност самa по себе.
– Фактот на интензивирање на комуникацијата, бидејќи очекувам по мојата средба да има средба и помеѓу премиерите и влегуваме веќе во еден нов модус на комуницирање со нашиот сосед, а праксата и историјата покажуваат дека секогаш кога има добра комуникација се наоѓаат и решенија. Јас сум оптимист дека на овој начин ќе успееме да ги надминеме евентуалните разлики кои постојат иако инструментите во рамката за надминување се веќе дефинирани со договорот за добрососедство, но прашање е на внесување на нова енергија, нова динамика во имплементација на договорот, оцени Османи.
Во однос на Договорот за добрососедтво со Бугарија, Османи вели дека во него има обврски и за нас и за Бугарија.
– Главната обврска на Бугарија е членот 2 во Договорот, што предвидува дека Република Бугарија ќе ја поддржи евроатлантската интеграција на Република Северна Македонија. И тоа сметаме дека е важен дел од обврските. И тоа досега е почитувано. И во делот на членството во НАТО и во делот на консензусот на одлуката за започнување преговори со ЕУ и очекувам истото тоа да се повтори сега со консензусот за преговарачката рамка и за започнување на меѓувладината конференција, рече шефот на дипломатијата.
Меѓутоа и нашите обврски, потсети Османи, што се дефинирани во членот 5, став 2 од Договорот, а тоа всушност се взаемни обврски, е тоа дека ќе се формираат комисии на историчари кои ќе ги разгледаат врз основа на историски факти различните интерпретации на историските настани.
– Можам да кажам дека тука и покрај различната интерпретација колку работела комисијата, фактот дека за 20 месеци имало 9 средби, во кои е постигнат значаен резултат за повеќе историски епохи не може да се занемари, меѓутоа прашање е која динамика можеме да ја наметнеме и во услови на пандемија и во услови на други ограничувачки фактори, истакна Османи.
Во однос на Грција, додаде шефот на дипломатијата, се работи на Акционен план за имплементација на Договорот.
– Се разбира очекуваме и од Грција во својот дел да работи на имплемтација на обврските, рече министерот за надворешни работи.
