Министерот за економија Крешник Бектеши денеска се сретна со Нивес Тигањ, амбасадорка на Хрватска во земјава. На средбата, како што информира Министерството за економија, станало збор за економската соработка меѓу двете земји, мерките за справување со социо-економската криза предвизикана од коронавирусот како и економските политики на новата Влада за идниот развој на економијата.
Амбасадорката Тигањ упати честитка за изборот на новата Влада, како и за повторниот избор на министерот Бектеши за министер за економија.
На средбата министерот ја информираше амбасадорката за политиките и мерките кои ги спроведе Владата во справување со последиците од пандемијата, пред се во делот на поддршка на економијата.
Министерот Бектеши се заблагодари за пријателската поддршка од Хрватска во демократските и евроатлантските процеси на земјава и истакна дека и покрај традиционално добрите билатерални односи, меѓу двете земји има голем простор за зголемување на економската соработка.
Според податоците од Државниот завод за статистика по намалувањето на трговската размена меѓу двете земји во 2019 година, според министерот Бектеши радува податокот што и покрај пандемијата, билатералната соработка меѓу двете земји во првите седум месеци годинава бележи раст 18,1 отсто, при што извозот од Северна Македонија кон Хрватска е зголемен за 24,7отто, додека увозот е зголемен за 11 отсто.
Овие податоци, како што истакна министерот се поттик двете земји во наредниот период да работат засилено на зголемување на трговијата, но и на поддршка на компаниите за проширување на своите деловни активности во двете земји.
Министерството за економија и во наредниот период ќе остане отворено за секаков вид на соработка со Хрватска, кажа министерот Бектеши, а со амбасадорката Тигањ се согласија дека ќе работат на дополнително унапредување на економските односи помеѓу двете земји.
