Ако Европската унија дозволи македонскиот јазик да биде пречка за нашата интеграција, тогаш таа нема да ја заслужи придавката Европска, рече вицепремиерот Никола Димитров од Могилата на непобедените во Прилеп за време на одбележувањето на 11. Октомври.
Димитров порача дека ниедна држава или меѓународна организација нема право да се меша во нашето право на самоопределување, ние сме Македонци и зборуваме македонски јазик.
„Борбата за “светата народна слобода” против најцрната страница од историјата – фашизмот, е една од најзначајните борби на нашите претци на кои денеска им положивме цвеќе. Ни оставија држава во аманет.
Првата цел на нашата борба како илинденски и асномски наследници, беше да ја зацврстиме и обезбедиме државата преку членството во НАТО. Таа работа ја завршивме.
Сега треба да “строиме живот, слобода, иднина за жени, деца, старци, младинци”, сега треба европскиот начин на живот да го донесеме дома, во нашата Македонија, во Република Северна Македонија. За да имаме просперитетна држава и силна економија, со добри работни места и плати, со правда за сите, со европско образование и здравство, со чиста животна средина.
Нека ни е честит и вековит 11 Октомври, Денот на народното востание,
вечна слава на паднатите борци.
Од Прилеп, градот Херој!“ истакна Никола Димитров од Прилеп за 11. Октомври – Денот на народното востание.
Ј. Ѓ.
