Три села од Општина Карбинци ќе добијат асфалтирани патишта. Договорот за изградба на локални патишта во должина од над два километри денеска и официјално го потпишаа градоначалникот Јордан Насев, директорката на Центарот за развој на Источниот плански регион, Драгица Здравева и претставници на градежната компанија „Ескаваторе“. Средствата за реализација на овие проекти, доѓаат од Платежната агенција, пренесе МИА.
-Вкупниот буџет на проектот е 15 милиони денари, со тоа што Данокот на додадена вредност е обврска на општината. Тоа се 2.300.000 денари, а 12.700.000 денари се од Агенцијата за финансиска поддршка на земјоделството и руралниот развој, вели Здравева.
Градоначалникот на Карбинци појаснува дека со тие пари ќе се градат три пристапни патишта. -Спој на регионален пат со населени места Калузлија, Ќепекчилија и викенд населба Вртешка. Вкупно се опфатени околу 60 домаќинства, а се работи за 2.200 метри пристапни патишта, рече Насев.
Претставниците на фирмата „Ескаваторе“ истакнаа дека имаат четири ефективни месеци за реализација на овој проект, а жителите на селата кои сега на одредени делови патуваат и газат во кал велат дека конечно напролет очекуваат да им се реши најголемиот проблем. Жителите од овие две села и од викенд населбата Вртешка во планината Плачковица во текот на зимата имаат најголеми проблеми за транспорт на храна како за домаќинствата, така и за стоката, но и за превоз на учениците, кои наставата ја посетуваат во село Карбинци или во Штип.
