Здруженијата за заштита на животни Pro Anima Берово, Шепасти Ентузијасти Скопје и граѓанската иницијатива Кане Корзо Надеж, неодложно укажуваат на ужасните активнoсти на управата на Ветеринарната болница од Штип, на чело со ветеринарот Крсто Митев.
„Покрај долу споменатите пропусти од огромни размери, мора да ги спомнеме и сите случаи на еутанзирани кучиња, меѓу кои и 2 здрави единки што денес се брутално убиени без никакво тестирање и фрлени на депонија. Останатиот дел е состојбата на таканаречениот стационар… нема вода. Цистерната за вода која наводно ја полни ЈП Исар од Штип, повеќе недели е празна. Водата тамошните активисти со туби од дома или од чешмата која се наоѓа 100-200м од стационарот и ја качуваат нагоре по ридот. Во 21 век, да. Ова со цел да им се обезбедиме вода за пиење секој ден на кучињата кои се горе. Кофите за вода од кои пијат кучињата се позеленети од што нема каде да се измијат. Се подразбира дека детергенти или било какво средство за чистење/дезинфекција нема.
Изметот на кучињата го собираат со раце секој ден. Затоа што, никој се нема појавено со недели да ги испере кафезите и просторот каде што се наоѓаат кафезите.
За секој поминат ден (24 часа) како “функционира” стационарот, односно за “надзор и одржување” Ветеринарна станица – Штип наплаќа по 1350 денари + ДДВ. Во ова не влегува трошокот за обезбедување на храна и вода или било каков трошок за лекување, кој Ветеринарна станица – Штип го наплаќа ПОСЕБНО (во прилог извадок од понудата). Моментално ова го прават само 2 девојки доброволно, иако Ветеринарна станица – Штип има ангажирано лице кое го плаќа 6000 денари месечно да го прави сето ова.
Кучињата кои се останати горе сè уште се сместени во кафези оградени и покриени со лимови. Направен е смешен обид да се изѕида ѕид околу кафезите. Стационарот функционира во ваква состојба и покрај добиените насоки од АХВ за негово подобрување. Ништо не е преземено оттогаш, чекаат да залади. Во меѓувреме почина штотуку стерилизирано куче од топлотен удар. Лицето кое работи за Ветеринарна станица – Штип проба и сè уште пробува да го сокрие ова.
Директорот на Ветеринарна станица – Штип е стар член на СДСМ – Социјалдемократски сојуз на Македонија. Сопругата на Крсто Митев е вработена во локалниот огранок на АХВ во Штип. Внукот негов е директор на Клиничката болница во Штип, а братучетка му, мајката на внукот, работи во Полициската станица во Штип. Дали можеби овие релации се причината поради која ништо не се презема и покрај многуте реакции“, стои во дописот на овие организации за заштита на животните.
Тие бараат најстрога казна за ветрениарот Крсто Митев, а од државата и Општина Штип, да се поништи одлуката за доделување на тендерот на Ветеринарна станица – Штип и да се распише нов, како и да се адаптира стационарот според Правилникот за ваков тип на објекти.
