Дипломатски извори од земји членки во Брисел за МИА објаснуваат дека сѐ уште се води битка на амбасадорско ниво од страна на Бугарија во нацрт заклучоците да влезат дополнителни забелешки, но, барем засефа, бугарските барања не се прифатени, јави дописничката на МИА од Брисел.
Сега останува да се види дали вчерашната средбата во Берлин ќе вроди со конкретен плод на утрешниот амбасадорски состанок во Брисел, кога земјите членки ќе треба да ги усогласат своите позиции во пресрет на министерскиот Совет на кој треба да биде донесена конечната одлука за усвојување на преговарачката рамка со Северна Македонија.
Ако се постигне договор до утре, амбасадорите на земјите членки ќе можат да ја усвојат преговарачката рамка, а во спротивно тие повторно ќе се состанат на оваа тема в петок, со надеж дека до тогаш ќе се надминат разликите и ќе се отвори патот министрите на 10 ноември да дадат зелено светло на документот.
Како што и е веќе познато, Бугарија негодува за јазикот како и за употребата на кратката форма на името, Северна Македонија, и бара да се користи конзистентно „Република Северна Македонија“, за да се „спречат иредентистички тенденции“. Ова барање, како и другите, не наишле на експлицитна поддршка од земјите членки на ЕУ, дури ни оние со крупни резерви кон проширувањето на Европската Унија.
Амбасадорите на земјите членки на ЕУ на последниот состанок минатата недела усогласиле текст за преговарачката рамка со Северна Македонија, во која не фигурираат барањата на Софија поврзани за јазикот, идентитетот и историјата, но Бугарија продолжува да лобира за измени, објаснуваат од Советот на ЕУ за МИА.
Според информациите до кои дојде МИА во Брисел, Бугарија има забелешки за делот од текстот во преговарачката рамка поврзан за добрососедските односи. За сега, нацрт текстот гласи дека добрососедските односи се суштински елемент на процесот на проширување и се бара од Северна Македонија да продолжи да ги негува односите со своите соседи и да продолжи да ги спроведува договорите со Грција и Бугарија во дух на доверба, брифираат повеќе дипломати од земји членки.
На последниот амбасадорски состанок во Брисел минатата среда, , бугарскиот претставник ги пренел барањата на неговата Влада да бидат додадени неколку елементи во преговарачката рамка како спроведување на билатералниот договор за пријателство „без одлагање и целосно“ како „предуслов“ за проценување на напредокот на Северна Македонија во преговорите за членство во ЕУ. Побарано било и да се додаде реченица поврзана за спречување на „погрешно толкување“ на историјата, велат дипломати од земји членки присутни на состанокот.
Македонската страна, според домашните политичари, е подготвена на компромис кој нема да задира во суштинските идентитетски прашања, велат од Скопје, и е подготвена да и даде гаранции на Софија дека посветено ќе работи на имплементација на Договорот за пријателство.
За германското претседателство ова прашање е од врвна важност, и од самиот почеток Берлин смета дека Северна Македонија мора до крајот на оваа година да ја одржи првата меѓувладина конференција, став поддржан од огромното мнозинство земји членки кои Скопје го сметаат за пример за целиот регион.
