Кривичниот суд му го замрзна имотот на бизнисменот Трифун Костовски, сопственик на пропадната Еуростандард Банка, пренесе Алсат М.
Блокадата доаѓа на барање на Обвинителството за организиран криминал и корупција. Замрзнати се хартии од вредност, сметки и недвижен имот на негово име како и на членови на неговото најтесно семејство. Отворена е предистражна постапка за четири лица а обвинителството не споделува детали оти во овој дел постапката била тајна. Со блокирањето на личните средства ми се одзема правото да ја докажам вистината за Еуростандард банка – пишува во колумна за порталот Либертас, Трифун Костовски.
„Сега посегнаа да ми го блокираат имотот, бидејќи тоа е можноста да ја водам натамошната битка за вистината. Да појаснам што тоа значи: имам имот, не смеам да го отуѓам, а сакам да го отуѓам бидејќи ми се потребни финансиски средства за водење на оваа војна. Што уште остана да ми земат? Мојот живот? Им го нудам на тацна“, напиша Костовски.
Костовски во колумната посочува дека му е блокиран имотот за кој работел последните 35 години. Инаку Еуростандард банка ја изгуби дозволата за работа во август. Имаше преку 100 илјади клиенти со сметки. На 780 граѓани им се делумно вратени заштедите кои ги чувале во банката. Вкупно до сега се вратени над 70 милиони евра преку Фондот за осигурување на депозите за штедачи кои имале до 30 илјади евра заштеда. Оние со заштеда од над 30 илјади евра бараат владата да ги обесштети во целост и да им ги врати парите а државата да чека да биде обесштетна преку стечајната постапка која се води во граѓанскиот суд.
