„После 2002 година, проектираниот буџет за следната година е сигурна сум најголемиот. Оваа година обезбедивме 12 милиони денари наменети за заштита на црквата Св. Ѓорги во Курбиново бидејќи отпочнатa е конзервацијата на архитектурата на црквата, превентивната заштита на фреските е направена, надзорот е обезбеден, но, проект за конзервација на фреските сè уште не е подготвен. Од тие причини, заедно со музеј Битола и со постоечките кадровски потенцијали во земјава, а пред сè, јас како прв човек на Министерството за култура и тимот, работиме интезивно да обезбедиме и странска поддршка и експерти коишто ќе се вклучат заедно со домашните експерти во подготовка на проектот за конзервација.“, истакна министерката за култура Ирена Стефоска во гостувањето во „Утрински брифинг“, на Слободен печат.
Стефоска се осврна и врз ситуацијата со корона-кризата и истакна дека тоа многу ги комплицира работите бидејќи сега е невозможно да се патува и веднаш да се реагира, но напомна дека има начини сето тоа за почеток да почне и во онлајн комуникација.
Министерката рече дека управата за заштита на културно наследство повторно актуелизирала црквата Св. Богородица, во с.Матејче, да биде ставено како културно добро во опасност.
„Уште во 2017г. управата за заштита на културно наследство иницирала ова културно добро (Св. Богородица, Матејче) да биде ставено како културно добро во опасност повторно се актуелизира таа процедура и колку што сум информирана националниот конзерваториум и управата, работат на тоа исто како и во случајот на црква Св. Ѓорги во Курбиново бидејќи ставањето според законската можност на едно културно добро во опасност подразбира мобилизација на сите ресурси во државата, финансиски, кадровски, вклучително и странска експертиза.“, рече Стефоска.
Таа потенцира дека во заштитата на нашите културни добра освен надлежните институции мора да се вклучат и локалните самоуправи и имателот на сите овие добра
„Она што мислам дека успеавме во овие месец и пол дена да направиме и го направивме, обезбедивме средства преку Министерството за култура за националниот конзерваторски центар да веднаш почне да работи превентивна заштита на црвката Св. Богородица во с.Матејче, да ја заштити од надворешни влијанија сè до моментот кога ќе почне да се работи на крајно решавање на овој проблем. Во заштитата на нашите културни добра освен надлежните институции мора да се вклучат и локалните самоуправи и се разбира имателот на сите овие добра во случајов зборувам за МПЦ. Апелирам сите страни да го понесат својот дел од одговорноста ако сакаме да направиме максимално професионален систем на заштита.“, рече Стефоска.
J. Ѓ.
