Маж тепал жена, татко тепал син, а син ги нападнал и родителите и жената. Вака звучат само дел од многуте случаи на семејното насилство, кој станува загрижувачки феномен во Тетово и околината. Речиси да нема ден а во билтенот на СВР Тетово да нема барем еден регистриран случај од ваква пријава. Насилството врз членовите на најтесното семејство расте се повеќе а во најголем број од случаите жртвите се жени. Само за три дена во Тетовскиот регион регистрирани се четири случаи на напади или насилство од најблиски членови на семејството.
Само вчера во тетовската полиција биле пријавени два случаи на семејно насилство. Во првиот случај триесетгодишна жителка на тетовско село вчера во 18 часот и 40 минути, во СВР Тетово пријавила дека еден час пред тоа во семејниот дом била физички нападната од нејзиниот 36-годишен сопруг Ф.М. Во 20 часот и 45 минути пријавениот е лишен од слобода и задржан во Полициската станица Тетово. Полицијата информира дека по целосното расчистување и документирање на случајот ќе му биде изготвен соодветен поднесок. Подоцна, околу 22 часот и 10 минути приведен бил Ф.И.(41) од Тетово, кој десетина минути пред тоа бил пријавен од неговата мајка дека се однесувал агресивно и им се заканувал на неговите родители и сопругата.
Ден претходно во тетовската полиција бил пријавен родител кој го нападнал неговиот син.
“Полициски службеници на СВР Тетово вчеравечер (9 декември) околу 22 часот и 15 минути, во тетовска Платица, го лишиле од слобода 75-годишниот М.З. од ова село, кој претходно бил пријавен дека околу 20 часот во дворот од нивната семејна куќа физички го нападнал неговиот син Б.З.(32).Во нападот, според пријавеното, М.З. користел и дрвен предмет. Тој бил задржан во Полициската станица Тетово за расчистување на случајот, а му биле одземени: ловечка пушка, пиштол, метален и дрвен предмет. Се расчистува и документира случајот”, стои во билтенот на СВР Тетово.
На 8 декември, триесет и четиригодишна жителка на тетовско село во СВР Тетово пријавила дека дваесетина минути пред тоа во нивниот семеен дом физички ја нападнал нејзиниот 35-годишен сопруг. Пријавениот набргу бил приведен и задржан во Полициската станица Тетово за расчистување и документирање на случајот, по што против него ќе следува поднесок.
Овие случаи се регистрирани само во период од три дена, а последниот период има се повеќе такви случаи. Случаите кои се пријавуваат и процесираат од надлежните институции не се единствените кои реално се случуваат во овој регион. Неофицијално се зборува за многу повеќе случаи кои се јавна тајна, но истите не се пријавуваат во полиција. Како причина за молкот на многуте жртви на семејното насилство се споменуваат традиционалниот менталитет, срамот од предрасудите и стравот од понатамошните последици.
А. Зеќири
