пишува: ЏАБИР ДЕРАЛА
Долго размислував, разговарав со многу луѓе од најразлични профили и решив, конечно, да испловам и да се впуштам во немирните и неизвесни води на македонскиот комерцијален медиумски простор. Ни оддалеку не помислувам да го напуштам својот општествен и граѓански ангажман во кој спаѓа и одговорната работа во ЦИВИЛ и во медиумската платформа на организацијата, на кои им оди подобро од кога и да е.
Тие што не ме познаваат доволно, ме прашаа како ќе успеам да бидам на две места во исто време. Мојот одговор беше: „Јас секојдневно сум истовремено на најмалку три места.“ Тие што ме знаат подобро, само ме прашаа кога почнувам.
Навистина, кога сте дел од добар тим, како да не важат законите на физиката. А јас ја имам среќата секогаш да бидам опкружен со извонредни луѓе, фантастично добри колешки и колеги, другарки и другари.
Фронтот го отвораме во период кога беснеат лагите и омразата, кога вредностите се заменети со подмолно подривање на темелите на државата и демократските процеси. За тесни интереси и бегство од правда се фрлаат во неврат судбините на луѓето и се уништуваат шансите за напредок и пристоен живот. Тоа не смееме да го дозволиме!
Ова е време кога сите ние сме пред избор, секој од нас, кој-а и да е, каде и да се наоѓа. Дали да се предаде битката за подобро и нормално, европско општество, да се затворат очите…? Или да се зачекори цврсто и решително напред? Мислам дека одговорот е очигледен.
Затоа…
Го отвораме Фронтот за одбрана на македонската иднина, за евроатлантските интеграции, за правда и демократија, за човекови права, еднаквост и слобода.
Ќе се обидеме заеднички да ги разбереме тешките одлуки во процесите за реформи и демократска трансформација на општеството. Да го изодиме тешкиот пат од клиентелистичко во општество во кое владеат европските и зелените вредности. Ова е Фронт против национализмот, омразата, радикализмот.
Убеден сум дека е можно да се постигнат овие цели и во комерцијалниот медиумски простор. Ќе дадеме сѐ од себе да бидеме пример за општествено одговорен медиум.
Сите одговорни и совесни граѓанки и граѓани можат да дадат придонес да го спречат назадувањето. Сечиј придонес е драгоцен, без оглед на тоа колку некој мисли дека е немоќен и неважен. Нема неважни луѓе. Со самото тоа што ова го читате, веќе сте во позиција да помогнете.
Заради сево ова и заради низа други причини што произлегуваат од моралните обврски кон нашето општество, решивме да го отвориме овој Фронт.
Frontline на англиски значи борбена линија, но означува и „најважна позиција (став) во една дебата или движење“… На нашиот, македонски јазик, ако го преведеме во нашиот контекст, тоа значи линија на фронтот или, едноставно Фронт. Нашиот Фронт. Сите сме на првата линија на Фронтот против лагите и деструкцијата.
Нашиот нов медиумски проект, што ќе го предводам најдобро што можам, ќе се обиде да го задржи вниманието на публиката на важните теми и настани во политиката и во општеството. Истовремено, ќе понуди и богатство од култура, уметност, забава, музика, филм, технологии, спорт…
Ова ќе биде наше заедничко место за информирање и забава. Ќе биде и патоказ кон места корисни за едукација и разонода. Ова е линија на фронтот каде што со насмевка ќе споделиме сѐ што ни е важно, сѐ што нѐ весели или нѐ лути.
Пишувајте! Споделете ги со нас вашите доживувања! Споделете инфо за вашиот омилен филм или книга, за концертот што сте го посетиле, настан во вашето место на живеење…
Се разбира, ова ќе биде место и за бизнисот и економијата. Ќе ги следиме најновите достигнувања или предизвици поврзани со парите, стандардот и инвестициите. Ќе бидеме простор и за тие што ги нарекуваме дијаспора, а тоа се, всушност, нашите блиски што заминале од земјава. Ќе им кажеме и покажеме до каде сме, како се развиваме, што можат да направат за нас, што решивме да останеме на ова парче македонска земја.
Сето тоа и многу повеќе! Ве повикувам, сите да се собереме на едно место, наше место, на првата линија на Фронтот. Да слушнеме, видиме, прочитаме и напишеме нови страници на едно поубаво секојдневие, заедно.
Џабир Дерала
Discussion about this post