Министерката Мила Царовска, денеска во Битола, каде претстави еден од петте групни домови за сместување деца, изјави:
– Ова е историски ден затоа што повеќе немаме деца од нула до три години сместени во институција, и тоа е голем исчекор за почитувањето на детските права и човековите права во нашата држава.
Царовска потврди дека 27 деца се сместени во мали групни домови во Битола и во нив има простор и за интервентно сместување.
-Познатиот Мајчин Дом во Битола кој згрижуваше деца од нула до три години денес се трансформира и сите дечиња се преселени во мали групни домови во кои што сите вработени се прераспоредени и нити еден вработен не остана без работа. Обезбедивме соодветни услови, топлина и семејна грижа во која децата може да се развиваат и да го постигнат својот максимален потенцијал, а притоа ги задржавме стандардите на институцијата. Со оваа активност направивме многу за нашата држава, поставен е нов стандард, ново ниво за заштита на децата во нашата држава и горди сме на тоа, нагласи Царовска.
Според амбасадорката на Велика Британија Рејчел Галуеј, поддршката на проектот на Министерството за труд и социјална политика е мотивирана од желбата децата да бидат сместени во подобри услови, односно во домови.
-Овој процес е систематски и со цел да им се даде поддршка на децата и на семејствата во цела држава да може да ги одгледуваат своите деца и во таа смисла Велика Британија со задоволство сака да биде дел од овој владин проект, истакна амбасадорката Галуеј.
На отворањето на еден од петте групни домови во Битола присуствуваа претставникот на УНИЦЕФ Бенџамин Перкс и градоначалничката Наташа Петровска.
-Дечињата ги згрижуваме во подобри услови и во домашен амбиент. Но, објектот на Мајчиниот Дом во Битола и понатаму ќе биде функционален затоа што дел од сместувачкиот капацитет ќе биде адаптиран за деца кои се сметуваат во Детски градинки со што и нив ќе им излеземе во пресрет, истакна Петровска.
Извор: МИА
Discussion about this post