пишува: ЈАНЕ ЃОРЃИОСКИ
Одам на прес. Двајца директори и Премиер даваат изјави и одговараат на прашањата од новинарите. Пресот е за укинување на квотите за лекови. Исклучително сериозна и битна тема. Новинари еден куп. Добро е, препознавам само два-тројца, што значи другите мора да се ок. професионалци. И навистина, имаше убави и корисни тематски прашања.
Следи одговор на прашањето што со право се поставуваше во јавност: „Дали ќе може друг да подигне лек за лице кое од различни причини е оневозможено да појде и само да си го подигне лекот?
Одговор даде еден од директорите на ФЗО – Орхан Рамадани:
„Посебно нагласувам, постарите лица, деца под 18 годишна возраст, како и лица кои не се во состојба сами да ги подигнат лековите, не треба да стравуваат дека ќе останат без лек. Предвидена е можноста, во нивно име, нивни блиски да може да го подигнат лекот“
Наредниот, или истиот ден имаме ваков наслов на Курир.мк:
„Од денеска нема да можете да земете лекарства за болен роднина – лекови на рецепт само со лична карта или пасош“, па додаваат: – Тоа би значело дека болните лица ќе мораат сами да одат до аптека да ги подигнат потребните лекарства, односно во нивно име нема да може никој да ги подигне.
Одма после објавата, Курираната го презема и објавува ова на своите портали, па се штанца на социјалните мрежи. Луѓе што ја прочитале дезинформацијата на Курираната, загрижени, не им се верува како може ваква мерка…
Читам и не ми се верува. Па тука, околу мене беа непрокопсанициве што ја пренесуваат оваа лажна вест. Тоа се оние Ремфилд вазали на вемерото, јасно ни е на сите тоа, но не престануваат да нè изненадуваат со тоа до каде им се границите и ги имаат ли воопшто. Како е можно ова да го пишат, кога сите слушнавме како Рамадани посебно нагласи дека лицата кои не се во состојба сами да појдат во аптека, не треба да стравуваат зашто во нивно име може нивни блиски да им набават лекови?!
Не се ова ненамерни грешки. Вакви манипулации не може да се исправат или да се аминуваат со какви и да било извинувања или коригирања. Патем, во моментов дури го пишувам ова, нема никаква корекција, објавување на демант, или некакво извинување.
А, и од кого да очекуваме извинување, кога сигурно на пресот имаше лично присутен новинар на Курир што ја слушна изјавата на Орхан Рамадани? Не е можно да не разбрале една толку едноставна изјава. Пак ќе речам, пред мене на пресот беше еден од Курираната, кој на својот партал-портал ја прекопира дезинформацијата без око да му трепне.
Сакале да признаеме или не, тие се безкрупулозни дезинформатори и ширачи на лажни вести. Ќе сака да признае новинарското здружение, или сè уште ќе се вади на некаква колегијалност, но тие луѓе што намерно лажат и дезинформираат, без разлика што при тоа користат медиум, не се новинари.
Прашувате на кого треба да им се извини Курираната?
Па ако има бар малку човештина останато во нив, треба да им се извинат токму на тие болни, изнемоштени и други лица кои не се во можност сами да појдат и да си ги подигнат лековите. Овие пропагандни машини немаат ништо човечко и професионално во себе.
Можете ли да замислите каков стрес доживуваат тие луѓе кога ќе прочитаат таква дезинформација?
Замисли да си изнемоштен возрасен човек „врзан за кревет“ и читаш дека ако сакаш терапија, ќе мора сам да си појдеш и да си го подигниш лекот од аптека лично ти?! Како ќе ги разубедите овие луѓе дека текстот е лага, кога тие се учени да веруваат на пишаниот збор во медиум, па коментираат: – Ма мора да е вистина, башка прочитав на повеќе места.
А, Курирската машинерија има цела плеада непрокопсани партал-портали кои ја шират дезинформацијата како вироза. Имаат и илјадници ботови што потоа ги сеат тие линкови од фејк профили и од лажни Фејсбук групи затскриени зад примамливи имиња.
Ширењето на паника им е главниот мотив на тие партал-портали и ботови. Ним им кажале дека првата реакција на читателите е бурна и гневна, потоа следи разочарувањето. Тие посветено работат и знаат дека крајниот резултат го постигнуваат во моментот кога читателот губи секаква надеж, па почнува да ги прифаќа информациите „здраво за готово“ и продолжува резигнирано се до наредната дезинформација. А, манипулаторите не застануваат. Тие се силно организирани чим можат да држат толку висок интезитет.
Да не се лажеме дека ќе ги победиме со некакви кодекси за однесување и поведенија. Тие никогаш нема да застанат, ако не се стави некакова рамка за регулација. Таа рамка за само/регулација треба да ја предложиме ние, т.е. вие новинарите и здруженијата. Таа рамка е потребна дури имаме колку-толку сила и желба да се бориме против дезинформациите и да ги препознаваме дезинформаторите.
Таа рамка ни е потребна С Е Г А и О Д М А!
Discussion about this post