известува: ВИДОСАВА СТОЈЧЕСКА
Спонтан натпартиски протестен собир кај споменикот со кодно име Воинот на коњ, беше организиран вечерва под мотото „Послушајте патриоти, парите не смее да се враќаат кај граѓаните“. На спонтано организираниот собир, онака шетајќи се по плоштадот, случајно му се придружи и највисокото раководство на најголемата опозициска партија, заедно со сите новоназначени советници.
Инаку, лидерот, раководството и советниците беа излезени, сосема случајно, уште во текот на попладнето, на рекреативна прошетка и тим билдинг, ме разбираш, носејќи големи плусови на плеќите, како потврда за нивните позитивни ставови и пораки. Нив, неупадливо ги следеше тајната полиција.
На собирот, беше искористена приликата, сосема спонтано, пред насобраните пијаници, пардон, демонстранти, да се промовира и најновиот, 17-ти советник, Суперхик, кој е странец, но извонредно течно се служи со македонска ракија.
Лидерот одржа спонтан говор што го беше запишал претходно во телефонот, за време на прошетката, ете, за не дај боже, да не му притреба за вакви, непланирани дешавки, како што се изрази, без насмевка, пред да почне да читањето.
Па рече:
„Оваа расипничка власт решила да се расфрла со парите што со тешки маки се собираат во државната каса! И, наместо да гради споменици и фасади, што ќе останат за генерациите после нас, Зоран Заев и СДСМ безмилосно ги покачуваат платите и социјалната помош, враќаат пари од ДДВ на граѓаните, а се спремаат и пензиите да ги покачат! Ова не се видело до сега! Народот бара правда! Платите, социјалната помош и пензиите ќе се потрошат, а народот ќе остане без споменици!”
Лидерот зборуваше уште околу само 40 минути, а потоа се извини што мора да го прекине говорот, бидејќи му цркнала батеријата.
Нешто пред полноќ, му даде збор и на Суперхик кој во својата кратка здравица ги повтори заложбите на партијата дека, кога ќе дојде на власт, ќе продолжи да краде од сиромашните за да им даде на богатите.
Потоа, сите заедно, сосе советниците, ги извикуваа познатите пароли, меѓу кои и најновиот слоган предложен од Суперхик: „Парите од граѓаните кај државата, ДА! Парите од државата кај граѓаните, НЕ!“
Полноќниот натпартиски и спонтан протест на опозицијата го привлече и вниманието на постојаната мисија на меѓународните набљудувачи во земјата кои одушевено, иако неутрално, спроведуваа мониторинг од терасата на хотелот Мериот, инаку сопственост на еден скромен бизнисмен и патриот.
Пред насобраните курири, лидерот ги соопшти познатите опозициски барања, кои му се извезени на поставата од палтенцето, во случај да му цркне батеријата:
- Да не се покачуваат платите и социјалната помош и да не им се враќаат парите на граѓаните. Никако покачување на пензиите!
- Стоп за реформите во здравството и враќање на квотите за лекови што траат само до 5-ти во месецот, за да се стимулира економијата.
- Сваровски судство, а не ова сега, на ништо не личи!
- Крив пат е подобар од прав пат, затоа што не е досаден.
- Предвремени избори, макар и во октомври идната година. Под услов да победи опозицијата.
- Прекин на незапочнатите преговори со ЕУ.
- Откажување на членството во НАТО и приклучување кон Варшавскиот пакт.
- Да му се забрани на Зоран Заев да се среќава и да се спријателува со лидерите на најголемите демократски држави во светот.
- СДСМ да не гради патишта и да не ги поправа улиците, затоа што тоа му текна прво на почесниот претседател на нашата партија.
- Солун е наш!
На крајот, сите наздравија со Суперхик и спонтано се качија во партиските автобуси за да заминат кон своите домови каде што, расипнички, од денеска започна грејната сезона.
Дисклејмер: ОВА НЕ Е ЛАЖНА ВЕСТ, ТУКУ Е СПРДАЧИНА. ЗА ЛАЖНИ ВЕСТИ, ПОЈДЕТЕ КАЈ КУРИРИТЕ, НИМФОМАКСОВЦИТЕ, МИДЕРИТЕ И ОСТАНАТИТЕ ЛЕВИ И ДЕСНИ ТАПОГЛАВЦИ.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
