Mеѓународна конференција „Жени во индустријата“ ќе се одржи денеска и утре во Скопје, во организација на Асоцијацијата на здруженија на инженери и ЕВН Македонија АД.
Дводневната конференција се одржува под мотото „Здружени лидери за унапредување на родовата еднаквост“ и ќе вклучи учесници од различен профил, меѓу кои извршни директори, сопственици, претседатели, менаџери и жени вработени во сите организациски нивоа на домашни и меѓународни компании, како и студенти и активисти.
Образование, регрутирање и вработување, развој на кариера, ангажирање и задржување на вработените се само некои од темите на кои ќе дискутираат водечки експерти во различни области од Северна Македонија, Австрија, Италија, Холандија и од Шведска.
Конференцијата е најавено да ја отвори премиерот Зоран Заев.
– Горди сме што веќе трета година по ред ја организираме оваа меѓународна конференција, чија главна цел е промовирање на родовата еднаквост и зајакнување на улогата на жената во општеството. Годинава вклучуваме и повеќе индустрии во кои доминира машкиот пол, а во фокусот се вмрежувањето и запознавањето со светските трендови, по примерот на водечките компании и експертите од различни области. Со Асоцијацијата на здруженија на инженери како наш стратегиски партнер и останатите поддржувачи на настанот продолжуваме да ги поттикнуваме сите засегнати страни проактивно да земат учество во охрабрувањето и зајакнувањето на позицијата на жената во општеството, особено во бизнис-секторот, истакнува Штефан Петер, претседател на Управниот одбор на ЕВН Македонија.
„Жени во индустријата“ е меѓународна конференција со економски императив за создавање родово инклузивен и одржлив раст, фокус на презентирање програми и иницијативи што го забрзуваат вклучувањето на жените во работната сила, идентификување алатки што ќе го олеснат пристапот на жените до разните кариерни можности, како и обезбедување средина во која жените професионалци и студентите имаат можност да преземат конкретни чекори кон унапредување на кариерата преку вмрежување и проширување на можностите за образование.
Извор: МИА
