Денеска во Основниот кривичен суд Скопје, со изведување на материјални докази, продолжи судењето за изборни нерегуларности „Титаник“.
Предметот, се наоѓа во доказна постапка, а го води судијата Осман Шабани. Застапник на обвинението е обвинителката Лиле Стефанова. Досега се изведени околу 5.400 од над 5.900 предложени материјални докази од обвинителството.
Се изведуваат скенирани документи од судски записници и решенија, како и лични документи, барања и одлуки.
Освен поранешниот премиер Никола Груевски кој е во бегство, во „Титаник“ обвинети се и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
Случајот го отвори СЈО, за потоа да го преземе државното Јавно обвинителство.
извор: МИА
