пишува: БРАНКО ТРИЧКОВСКИ
Национално единство може да се постигне ако Пендаровски, Заев и Албанците прифатат да бидат чипирани во идиоти. Ако се подложат на ментални сунети и преминат на вмровизам. Тоа би било многу јако единство. Никој ништо не би ни можел. Дури ниту Макрон. А релативно лесно се постигнува. Просто, се ослободуваат од сите вишоци разум, кои и така и така не се кој знае колку големи, од пристојноста и моралот и стануваат надежни примитивци, глупаци и општонационални штеточини од прв ред.
Верувам дека в недела од Водно кон градот ќе се слушнат позитивни вести, ќе зачури сивиот дим од оџакот на претседателската резиденција што ќе значи дека сме постигнале единство на сите идиоти, односно дека успешно и без остаток е остварен историскиот процес на идиотизацијата на целата нација.
Не, господине претседателе.
Вие мора да ја соочите нацијата со вистината за неа. Независно колку е таа тешка и болна. Обратно, колку е потешка вистината, тоа соочување треба да го направите порешително и покатегорично. И да се обидете да остварите единство на нацијата, а не на политичката елита од која еден дел триесет години континуирано, со сите сили, систематски, работи против Македонија. Вклучително и во најновите случувања во врска со датумот. Да не беше така, вие тоа убаво го знаете, денеска ќе славевме најмалку пет години од полноправното членство во Унијата. Знам дека е тоа тешко и ризично, но тоа е неизбежно.
Ризикот ќе го спуштите со магнетната резонанца на политичката конфигурација, со категорична критика и со јасна проекција и интерполација на задачите и ефектите. Измиените мозоци на нацијата мора да се наполнат со релевантни содржини, со тешки вистини, па да се пуштат луѓето да решат што сакаат да прават со себе. И од себе. Дали сакаат да бидат разумен историски, државен, национален и граѓански субјект или сакаат да бидат флотантна маса во стационарот на своите гаулајтери.
Тоа ќе биде Македонија ако не се охрабрите: територија и човечки стационар и тоа при најдобар развој на настаните. Многу лесно можеме да влеземе во фазата на интензивното распаѓање. Луѓето мора да се соочат со тие опции и да се мобилизираат. А не да се лажат.
Затоа што лагата нема да ја спречи трагедијата.
Овој спектакл со датумот мора да го искористите за провокација на запретаните чувства на солидарност и заедништво во одбраната и развојот на Македонија на линијата на која работите се одвиваа во последните две и кусур години, во декласирањето и демистификацијата на оние кои цело време се бореа Македонија да не успее. Ова не е време на пораз, ова е време Македонија да се избори против ѓаволот во себе.
Ѓаволот кој се вика вмро-дпмне.
Можете од тоа да бегате со идеите за лидерската средба, но јас ви кажувам дека е тоа нормален гест, на нормален претседател, во нормална земја. Нашата томографија покажува дека ние имаме многу сериозен елемент на ненормалноста.
ВМРО-ДПМНЕ!
Гротескно изгледаат сите напори, во сиот изминат период, една ординарна злосторничка инсталација, да се третира како политички субјект. И тоа, внимавајте, во името на националното единство и на мирот, по малку и на срамот од себе и на политичката коректност, целата нација триесет години правеше будала од себе за да не ѝ кажат дека е многу разединета.
Се разбира дека резултатите беа сосема спротивни.
„Во случајот со политичката коректност, не станува збор за ништо друго освен за напад врз слободата. И на тој начин треба да се однесуваме спрема тој феномен и спрема неговите адвокати. Спрема феноменот како спрема дисторзија на вистината, а спрема неговите адвокати како спрема ситни неавтентични човечиња.“
Ова е Марио Варгас Љоса.
Мислам дека е паметно да го имате предвид.
Јас тука не сакам да ги повторувам сите злодела на таа инсталација кои во меѓувреме беа комбинирани со слични самити како овој што сте го закажале за в недела или со таканаречените лидерски средби.
Навистина гротескно.
И сега тие се закануваат дека им поминало трпението зашто Макрон не ни го дал датумот што и тие не би ни го дале да беа на местото на францускиот претседател.
Тој вид на самоизмамувања мораме да го пресечеме, почитуван господине претседателе.
Македонија нема време.
Преправањето и инерцијата на преправањето ве тера да свикате самит, а, слушам, Заев размислувал за оставка. Па, може и така. Нормалниот свет да глуми нормална држава и да влече потези кои се нормални за нормална држава, но ненормалниот дел од нацијата секогаш е тука тоа да го прифати и од нормалните луѓе да направи глупаци.
Па нели мислите дека е тоа малку премногу.
И од нив и од нас.
