Судијката Оља Ристова преку својот Фејсбук профил го искажа своето мислење околу застарувањето на кривичните дела направени од функционери. Таа предлага измена на Кривичниот законик по примерот на Хрватска каде кривично дело сторено од функционер никогаш не застарува:
Некаде во 2012 година присуствуав на предавање кое го држеше г-дин Марин Мрчела, судија во Врховниот суд на Хрватска, денес претседател на ГРЕКО.
Во своето предавање истакна дека во тогашните измени во Кривичниот законик на Хрватска е внесено дека, доколку функционер стори кривично дело за време на вршење на својата функција, застареноста се прекинува, односно истата почнува да тече од моментот на престанокот на функцијата. На ваков начин, речиси не постои можност делото да застари.
На пример, доколку министер стори кривично дело за време на вршење на својата функција, застареноста почнува да тече од моментот на престанок на мандатот. Доколку судија или обвинител сторат кривично дело за време на вршење на својата функција, во тој случај застареноста почнува да тече по констатирање дека ги исполниле условите за старосна пензија.
Исто така, Кривичниот законик на хрватска предвидува и построго казнување за функционери, во однос на други сторители за исти кривични дела, поѓајќи од фактот дека функционерите треба да имаат повеќе развиена свест од останатите и да служат за пример пред другите граѓани.
Време е да се размисли за ваков вид на измени и во нашиот Кривичен законик, напиша судијката Оља Ристова на својот фејсбук профил.
Ј.Ѓ
