Јас, заедно со Вас почитувани, ќе бидам упорен во борбата за овој град да стане поубав и попристоен, а “чудните сили” нека тераат. Осудени се на пропаст“, напиша Шилегов на Фејсбук.
Зелениот покрив на Градскиот трговски центар, првично требаше да биде готов летово, а потоа се пролонгира до Денот на ослободувањето на Скопје, 13 Ноември, но и до тој ден не се пушти во употреба.
На покривот до вчера се забележуваа работници, кои чистеа дел од патеките и околу новопосаденото зеленило, а таму до скоро имаше механизација и алати за работа.
На почетокот на работите за поплочување на дел од плоштадот на потегот пред ГТЦ до порта „Македонија“ градскиот татко Петре Шилегов не се откажа од крајниот рок за завршување на зелениот покрив на ГТЦ, односно Денот на ослободувањето на Скопје 13 ноември.
Сепак, тоа не се случи.
Од почетокот на изградбата на зелениот покрив на ГТЦ се соочува со проблеми. Најпрво дел од стручната јавност и граѓаните реагираа на идејното решение за изгледот, на што забележуваа дека има премалку зеленило, а премногу објекти.
Потоа, изградбата беше стопирана, кога `никна` кафуле на надворешната страна од ГТЦ. Во меѓувреме, додека се уште беше во подготвителен дел од изграбата, неколкумина ги демолираа материјалите донесени за изградба на зелениот покрив.
Инаку, терасата на предната страна од Градскиот трговски центар во Скопје требаше да се претвори во пријатна зелена оаза, која граѓаните ќе можат да ја користат за одмор и рекреација.
Предвидени беа неколку водени површини, патеки, зелен простор, клупи за седење, кафуле и други содржини во корист на граѓаните, но просторот ќе биде и ограден заради безбедност.
Со овој проект требаше да се придонесе за намалување на температурата во центарот на градот за време на летните горештини.
Имено, кога температурата на плоштадот „Македонија“ е 27 степени Целзиусови, на покривот на ГТЦ температурата изнесува 37 степени, покажала неодамнешната студија за „жешки објекти“ во центарот на Скопје.
За изградба на проектот беше најавено дека ќе биде користена најнова технологија, а изведувачот ќе го бира УНДП, додека Градот го финансира проектот кој чини околу 33 милиони денари. За одржување на паркот ќе се грижи службата на ГТЦ, како и оној кој ќе го закупи кафулето, а секако најголемата грижа се остава на граѓаните.
Во план беше зазеленување и на покривите на едно училиште и една градинка во Општина Центар.
Билјана Богдановска
