Македонската полиција од утрово спроведува голема акција во скопскиот регион, во регионот на селата Грчец и Арачиново.
Според извори во Македонската полиција, во опсежната и голема акција има повеќе приведени, иако засега посебни детали не се соопштуваат.
Акцијата е во финална фаза и се очекуваат подетални и официјални податоци во секој момент.
Четири лица што учествуваа во вооружената престрелка заработија кривични пријави. Основното јавно обвинителство соопшти дека ќе ги гони за загрозување на сигурноста на полициски службеници. Иако тројца од пријавените беа лишени од слобода, обвинителството не побара притвор за нив. Министерот за внатрешни работи, Оливер Спасовски, рече дека е разочаран од ваквиот однос на обвинителството.
Постапката е отворена откако СВР-Скопје поднесе пријава за кривично дело – загрозување на сигурноста од чл. 144 ст. 3 од Кривичниот законик.
ОЈО информира дека четворицата пријавени ја загрозиле сигурноста на 11 полициски службеници кои биле на должност и вршеле легитимирање, упатувајќи сериозна закана по нивните животи.
За настан што се случил во хотелот неколку часа по пријавеното кривично дело, Министерството за внатрешни работи сè уште не го утврди идентитетот на сторителите кои со огнено оружје пукале кон сега пријавените лица, се вели во соопштението.
Досега за овој случај официјално е познато дека вооружениот инцидент се случил 35 минути по полноќ на 1 декември, кога врз петмина гости во ресторанот на хотелот, Е. И. (21), Е. И. (25), О. Б. (35), К.И. (41) и Љ.Ќ. (25), пукале три лица, чиј идентитет не е познат во јавноста. На нападот возвратил Љ.Ќ., полициски службеник кој во моментот не бил на должност, кој пукал од службениот пиштол кон нив, по што напаѓачите избегале. Според МВР, никој не е повреден.
