коментира: ЏАБИР ДЕРАЛА
Сѐ началник до началник, кадар промовиран уште во времето на узурпаторот на претседателската функција (Хорхе), тоа се предлози на вемерето за технички министер за внатрешни работи. Навидум, беспрекорни биографии, но со мало чепнување под површината, гледаме нешто друго.
За првиот предлог на Мицкоски, за што не се консултирал со никого, па сега сите во партијата му се гневни, немаше потреба од многу чепкање. Едноставно, Мицкоски се обиде да протури противуставен предлог – активен армиски полковник во униформа да го заземе местото на министер за внатрешни. Скандал, колку што беше скандал и начинот на кој се обидоа да се оправдаат (имало преседани и порано). Великите венецијанерки и поразени кандидатки им фалеше само да кажат дека 27 април беше преседан, па може и да се повтори…
Нејсе, помина тоа. Не им помина ни ждригањето од новогодишната руска салата, тие излегоа со нов кандидат. Нов кандидат, нов скандал.
Новиот кандидат за технички МВР(О?) е поранешен шеф на разузнавањето, исто така, назначен од Хорхе, кој своевремено во анкетниот лист „заборави“ да го внесе луксузниот стан од околу 90.000 евра. Како дојде до тоа? И како тогашната (Грујова) Антикорупциска комисија направила превид на „станче“ од 90.000 евра што го немало во анкетниот лист? Метежот на настаните ги запрета и овие, како и стотици други прашања, но не засекогаш. Може да се најдат со кратко пребарување на чичко Гугл. На некои страници се појавува error 404, но на повеќето ги има. Го има и молкот.
Во тоа време-невреме, прашањата поставени во текот на Шареното лето 2016 година, останаа неодговорени. Но, еве, како скелети што се ослободиле од бетонските окови на дното од матните води, сега испливуваат повторно на површината. И повторно молк. Можеби е продаден станот? Или подарен? Утрото е поитро од ноќта… Утре ќе видиме што ќе биде понудено како одговор. Ако воопшто има одговор. Добро, знаеме, сите што поставуваат незгодни прашања се комуњари и предавници! Друг одговор освен тој ќе има ли?
*
Неодговорените прашања се како нерешени убиства. Безбедњаците треба тоа најдобро да го знаат.
