пишува: ПЕТРИТ САРАЧИНИ
Со денови, сите гласници на опозициската ВМРО-ДПМНЕ се отепаа да ја убедат јавноста дека решенијата за техничката влада се професионалци и експерти, а не „партиски апаратчици“. Вака ги пофали и дел од „критичката јавност“. А тие, таман избрани, ревносно, во првата сабота по Нова година, се фатија за работа и се пофалија насекаде – со првиот работен ден како државни функционери.
Ќе беше добро, да беше така. Но, не е. Наместо министри за техничка влада, добивме токму партиски апаратчици, кои наместо за работа, се фатија за правење пропаганда и за злоупотреба на државни ресурси и работно време во партиски цели. Наместо експерти и професионалци, добивме повторно порака за враќање на истиот менталитет – за бришење на границата меѓу партијата и државата, за МВРО-ВМРО.
Оние што ги добивме како државни функционери, кои ќе добиваат плата од парите на сите граѓани, настрана пропаднатиот неуставен предлог за полковникот Ковачки, се далеку од експерти и стручњаци, кои се „непознати“ за партиската машинерија што се инсталираше цела деценија во сите институции за време на груевизмот. Тие беа дел од неа.
Имено, сегашниот министер за внатрешни Чулев, е раководител во Агенцијата за разузнавање во време на груевизмот и „Диво насеље“ во 2015. Министерката Мизрахи, биохемичарка и генетичарка, ги води пресовите на ВМРО-ДПМНЕ на тема социјала. Стаменковска-Стојковски, дополнителен заменик-министер во МИОА, беше пратеничка на ВМРО-ДПМНЕ од сегашниот состав, ставена на листа во време на Груевски. Заменик-министерот Трипуновски беше директор и советник во земјоделие за време на груевизмот и е подолго време задолжен за земјоделие во ВМРО-ДПМНЕ. Димитриеска-Кочоска, во време на груевизмот, работела во Министерство за финансии, а потоа и како директор за финансии во ЕЛЕМ, во време кога директор таму беше токму Мицкоски.
Туку, нејсе, да видиме како овие „професионалци“ го поминаа нивниот прв, ем саботен, ем работен ден?
Речиси сите (со исклучок на Чулев) имаа јавни комуникации на социјалните мрежи, од страници на кои не доминираат државните симболи, туку оние на партијата. Некои од нив објавија постови со партиска иконографија и партиски пораки во работно време. Други, пак, одржаа партиски состаноци во работното време.
Ниту седнати асолно во министерската фотелја, наместо да побараат некој ден да се запознаат со состојбите во ресорот и конкретните бројки како секој нормален министер во секоја нормална земја, тие веќе знаат сè. Дури и за машинеријата на ВМРО-ВМРО која никогаш не беше целосно деинсталирана од системот, троа премногу и пребрзо, нели?
Оправдувањата дека е сабота не држат вода, оти никој не ги тераше да се пофалат дека ја работат државната работа во сабота, наместо да тераат партиски активности. А тие се пофалија и со едното и со другото, во работен ден, кој би требало да трае 8 часа. Притоа, патувањата во други градови, во кои покрај државните се реализираат и партиски активности, ги плаќаат граѓаните. Со јазикот на ОБСЕ/ОДИХР, тоа се нарекува злоупотреба на државни ресурси за партиски цели.
Туку, нека им каже некој на техничките министри и заменици од ВМРО-ДПМНЕ, оние за кои велеа дека се професионалци и експерти, дека не се веќе партиски, туку државни функционери. Нека ги тргнат партиските симболи од насловните страници на нивните официјални Фејсбук пејџови. И, во работно време, не е убаво од позиција на министри, кои штотуку стапиле на функција, веќе од прв ден, освен со партиска иконографија, да се обраќаат со партиски вокабулар.
Освен тоа, ако веќе одат во други градови на партиски состаноци, нека го прават тоа надвор од работното време, со нивни, партиски, а не со државни возила и гориво платени од наши пари. Ако веќе работат во сабота, или нека тераат работа за државата, или за партијата, не може и двете одеднаш, драги мои „професионалци“!
Можеби не е дел од нивната партиска традиција и култура, но ќе треба да научат, оти непостоењето граници меѓу партијата и државата го оставивме во минатото.
Или пак, ова е уште еден показател, дека покрај враќање на останатите „убавини“ од минатото, ВМРО-ДПМНЕ сака повторно да ја брише и границата меѓу партијата и државата?
Сите права се задржани. УСЛОВИ ЗА КОРИСТЕЊЕ.
