Дамјан Манчевски, МИОА и потпретседател на СДСМ, одржа прес конференција во која ги наброја „постигнувањата“ на кадрите на ВМРО-ДПМНЕ во техничката влада.
Според Манчевски, со своето досегашно однесување, кадрите на ВМРО-ДПМНЕ не покажаа ништо, освен дека се кадри на Никола Груевски кои работат против интересите на државата.
Како последен доказ за деструктивното дејствување на кадрите на ВМРО-ДПМНЕ во техничката влада, Манчевски го наведе и барањето на техничкиот министер за внатрешни работи, Наќе Чулев, во својот кабинет да го смести советникот на Ѓорге Иванов, Синиша Алексовски. Тој ја потсети јавноста дека Алексовски со години беше десна рака на Иванов, а низ сведочења за процесот за 27 април јавноста можеше да слушне и за неговата улога во организацијата на настаните од крвавиот четврток.
Понатаму, Манчевски кратко се осврна на работата на техничката министерка за труд и социјална политика Рашела Мизрахи. Според него, Мизрахи уште од првиот ден ги навреди жените, а потоа влезе во расправија со медиуми, и јавно му кажуваше на новинар како и за што треба да известува. „Нејзиниот тим, видовме дека е составен од лица кои се креатори на проектот Скопје 2014, како и лица кои што биле дел од кабитенот на Диме Спасов. Со други зборови, ништо ниво“ – изјави Манчевски.
За дополнителниот заменик министер за земјоделство, водостопанство и шумарство, Цветан Трипуновски, Манчевски вели дека „на дело и многу директно, ни покажа што значи враќање на режимот. Наместо да се грижи за земјоделците, тој исто како Груевски упадна во простории на негови вработени и јавно ги снимаше и вршеше политички притисоци“.
„Трипуновски, освен тоа што има кривична пријава за проневера на 117.000 евра, е познат и по тоа што организираше партиски протести, каде што функционери и членови на ВМРО-ДПМНЕ глумеа дека се земјоделци“ – потсети Манчевски.
Понатаму, открива Манчевски, дополнителната заменичка министерка за финансии Гордана Димитриеска Кочовска во својот тим, исто така, има ангажирано лица блиски на Никола Груевски и Ѓорге Иванов, како и блиски соработници на поранешниот министер Зоран Ставревски кој што остави длабоки штети врз македонската економија. „И таму не гледаме ништо ново“, констатира Манчевски.
„Невенка Стаменковска Стојковски, која што е дополнителна заменичка министерка за информатичко општество и администрација е самата директно кадар на Никола Груевски. Таа беше во првите редови пред судовите кога се одвиваа судските процеси против криминалот на Никола Груевски и високи функционери на ВМРО-ДПМНЕ“ – вели Манчевски за својата техничка заменичка.
„Цел месец кадрите на ВМРО-ДПМНЕ се во Владата и не понудија ништо конкретно, ниту една мерка, ниту една препорака за тоа како евентуално институциите да функционираат подобро. И тоа е добро, тоа значи дека институциите функционираат согласно законите. Единствено што гледаме се блокади и обиди да се обнови режимот. Најверојатно, тоа се и насоките што ги добиваат од Будимпешта“, констатира Манчевски.
„Граѓаните го гледаат сето тоа и затоа на 12 април ќе го казнат ваквото однесување на ВМРО-ДПМНЕ и Христијан Мицкоски. На 12 април граѓаните јасно ќе порачаат дека режим никогаш нема да има повеќе!“ – заклучи Манчевски на прес конференцијата по повод работата на техничката влада.