Наќе Чулев во Љубанци, денешниот празник Прочка го прослави заедно со Јохан Тарчуловски, осуден воен злосторник од меѓународниот суд во Хаг за убиство на цивили во Љуботен за време на конфликтот во 2001.
„Херојот“ Јохан, кого Хашкиот суд го осуди за акција во која беа убиени невооружени цивили, старци и деца, очигледно е повторно адут за пропагандата на ВМРО-ДПМНЕ во кампањата за изборите.
Губитникот Јохан од локалните избори 2017, кога ја изгуби трката за градоначалничко место во Кисела Вода, е лик со кој на драго срце се сликаат и старите и новите ведети на ВМРО, како Чулев, а и претходно Мизрахи, која исто така неодамна објави фотографија со Тарчуловски.
Во недостаток на понуда за сите граѓани, на понуда за нормален живот без омраза и насилство, за иднина, ВМРО ДПМНЕ повторно го нуди минатото. Оваа партија продолжува да се потпира на национализмот, на поделбите и конфликтите кои сакаме да ги заборавиме, на омразата кон Албанците, пред сè, но и кон сите други заедници.
Што може да понуди еден Јохан Тарчуловски? По што е познат? Освен по една акција, во која нападна село со цивили, на вистинските фронтови го немаше, ништо не се слушна за него.
Кој може да биде придонесот на Тарчуловски за една подобра, економски просперитетна земја? Што може Јохан да придонесе во онаа најважна битка која ни претстои, за преговори и членство во ЕУ, што ќе донесе подобар живот и стандард за сите?
Никаков придонес. Никакво знаење. Само еден лик кој служи за мобилизација на омраза, и ништо повеќе.
А техничкиот министер за внатрешни работи Чулев, преку сликање со еден поранешен водач на параполициска формација, само покажува дека е далеку од технички министер кој треба да спроведе мирна атмосфера за граѓаните да гласаат без страв. Пораката на заедништво со Тарчуловски е спротивна на тоа.
На големиот христијански празник Прочка, ВМРО-ДПМНЕ ја официјализира националистичката кампања. Ова е јасна порака кон сите Македонци кои се против поделби, против омраза и против национализам. Порака која ќе ја примат и Албанците и сите заедници во земјава, а секако и меѓународната заедница.
