Излезе видео спот на дебитантскиот сингл на Katerinha, македонка која после студиите останува да живее и работи во Берлин.
Katerinha работи како музички менаџер и регрутер во Берлин, но со создавање своја музика се занимава уште од многу помлада возраст. Таа интензивно го истражува својот звук и стил како автор и изведувач преку своите искуства како басисткa, диџејкa, гитаристкa и пејачка.
Во моментов работи на финалната продукција на нејзиниот краток деби албум, чии песни ќе бидат објавени како синглови во текот на 2020 година.
„Trippin“ почнува како нежна љубовна песна и постепено се развива во игрив самба ритам.
Инструменталот е стилска мешавина на аналогни синтисајзери и перкусии, изведени од унгарскиот џез-вундеркинд Àbáse и дуото jazzbois. Бајковитото пеење на Катериња е испреплетено низ нејзината нежна поезија, прославувајќи го слаткото чувство на заљубување.
Видеото за „Trippin“ е снимено на пет различни локации во Македонија, Србија и Босна и Херцеговина.
Локациите од спотот се футуристички југословенски споменици изградени во бруталистички стил, во чест на партизанскиот отпор против нацистите и други окупатори.
Видеото зборува за визијата на Katerinha – да комбинира музички стилови (r’n’b/соул со латино и џез) во сценографија што досега не била во центарот на вниманието за уметниците од соул / поп-сцената. По тој повод, Katerinha ги покани француските современи танчери Егзосе Касонго и Астан Маер (со потекло од Конго и Мали) да изведат кореографија инспирирана од Западнo-Африкански, Crump и Body Expression стилови на танц.
Оригиналната идеја за сценографијата и сценариото е на режисерката Милена Виитман, која се потпиша и на спотот на Фолтин за песната “Ми се води љубов”.
Снимањето на видеото е независна продукција на Katerinha, без спонзорство и со драга поддршка од нејзините пријатели и семејство.
Целосно снимено на една камера, исклучиво со природно светло и без дополнителна опрема, ова видео спојува неколку видови уметност. Естетиката на сите елементи – музиката, природата, танчерите и архитектурата создаваат задоволство за сите љубители на убавината и предизвикува љубопитност за овие заборавени места.
