Власта и опозицијата излегоа со целосно спротивставени ставови за економската состојба, државниот буџет и животниот стандард на граѓаните. Додека премиерот Христијан Мицкоски преку математички споредби тврди дека актуелната влада ги зголемила пензиите за 325 отсто повеќе од претходната, лидерот на СДСМ, Венко Филипче, возврати дека власта ја третира државата како плен, троши на сомнителни тендери и ги игнорира растечките трошоци за живот.
За време на посетата на Прилеп, премиерот Мицкоски, одговарајќи на новинарски прашања, истакна дека во изминатите две години просечното месечно зголемување на старосната пензија изнесува 296 денари, наспроти 91 денар во времето на владата на СДСМ и ДУИ.
„Кога ќе се споредат овие два параметра, доаѓаме до 3,25 пати повеќе сега отколку во времето на владата на СДСМ и ДУИ, или тоа е математички прецизно 325 отсто“, посочи Мицкоски.
Според неговите пресметки, доколку се споредат првите 25-26 месеци од претходната влада со истиот период од актуелната, пензијата тогаш пораснала за вкупно 540 денари, додека сега растот изнесува над 6.800 денари, што претставува разлика од 12,5 пати. Премиерот ѝ порача на опозицијата „да ја прифати реалноста и конечно да излезе од безидејноста“, нагласувајќи дека Владата ќе продолжи со испорачување проекти и стабилизирање на системот.
Од друга страна, претседателот на СДСМ, Венко Филипче, остро ги отфрли споредбите на власта, порачувајќи дека двете политички гарнитури воопшто не се исти. Тој ја обвини власта дека наместо конкретни антикризни мерки, на граѓаните им нуди само ПР-најави во време кога синдикалната кошничка достигнува 70.000 денари.
„Ние ја сфаќаме државата како место во кое секој треба добро и квалитетно да живее. Тие ја сметаат за плен. Ние дававме мерки за поддршка на граѓаните, тие парите ги крадат преку криминални тендери. Ние дававме зголемување на плати и пензии, тие планираат повторно да купат нов владен авион“, изјави Филипче.
Лидерот на опозицијата потсети дека за време на нивниот мандат биле насочени две милијарди евра кон различни категории граѓани за справување со кризата. Филипче заклучи дека денес трошоците за живот, струјата и парното незапирливо растат, додека актуелното мнозинство упорно го одбива нивниот предлог за минимална плата од 600 евра, оставајќи ги семејствата со кредити и кирии на работ на преживување.
